Monforte presume de produtos autóctonos
A cidade do Cabe acolle esta fin de semana un encontro gastronómico no que se poderán degustar e mercar produtos autóctonos da comarca de Lemos e do sur de Lugo.
Por GC Tendencias | Monforte | 27/05/2016 | Actualizada ás 16:24
Con este evento, que terá lugar o sábado 28 e o domingo 29 de maio, o Concello de Monforte súmase á campaña “Quere o teu mercado” e aposta por incentivar a Praza de Abastos como centro neurálxico do comercio de proximidade e de calidade.
Estarán presentes nesta Feira Gastronómica un total de 12 postos nos que haberá produtos naturais como mel, pan, marmeladas, cervexa artesá, aceite e mesmo derivados do leite, da castaña e do porco celta.
O alcalde, José Tomé, apuntou que a celebración dunha feira destas características serve de escaparate para os pequenos produtores rurais e supón tamén unha aposta e un recoñecemento a estes “pequenos empresarios” que con tanto esforzo sacan adiante un gran produto elaborado, saudable e de calidade.
O sábado a Feira Gastronómica estará aberta de 10 a 14 horas pola mañá e de 17 a 20.30 pola tarde. O domingo a Feira só abrirá en horario de mañá de 10 a 14 h.
