Por GC Tendencias | Rubián | 14/07/2016 | Actualizada ás 18:44
Este xoves 14 de xullo celébrase a XIV edición da Feira Tradicional Outrora, feira que recrea o escenario comercial daquelas feiras rurais das que tanto nos falaban os nosos avós no que destacaba a presenza de produtos de alimentación autóctonos e os oficios tradicionais.
Aínda que moita xente se queixa de que sendo sempre o 14 de xullo resulta difícil acudir a ela cando cae entre semana pero tanto o alcalde como o resto de organizadores mantéñense firmes na convicción de que se debe respectar o día propio dunha das feiras máis importantes de Rubián. Será unha importante cita etnográfica e gastronómica onde se amosan os oficios, hai moitos postos de artesanía e os mellores produtos da zona. Para aqueles visitantes máis cativos que se animen poden participar nalgún dos obradoiros artesanais infantís programados.
Dado o éxito da pasada edición repetirase a orixinal concentración-exhibición de bicicletas e motos antigas con dúas categorías participantes: bicicleta e moto máis antiga ou mellor conservada e bicicleta e moto antiga máis orixinal e curiosa. Os participantes terán un agasallo e comida pagada na feira para dúas persoas.
Moi recomendables para os máis cativos a actuación de monicreques “Micromina Títeres” e a festa da escuma a partir das 17.30 horas, e para o público familiar os xogos interxeracionais ás 19.30 horas. Outros momentos de interese etnográfico deste evento son a recreación da “malla” que terá lugar ás 20.30 h.e a degustación do “isco no guizo” (touciño ao espeto) ás 22.30 h.
Programa completo:
10:30 h. Apertura das exposicións e representacións dos oficios tradicionais ao público.
11:00 h. II Concentración de Bicicletas e Motos antigas.
11:30 h. Pasarrúas da Banda de Gaitas Municipal.
12:00 h. Actuación do grupo de Danzas Municipal.
12:30 h. Concerto da Banda de Taboada Juan Montes.
13:30 h. Entrega de Premios da II Concentración de bicicletas e motos.
16:00 h. Obradoiros artesanais infantís.
17:30 h. Monicreques: Micromina Títeres: “Vacacións no mar”.
18:30 h. Festa da Escuma.
19:15 h. Actuación do Grupo de Fiandeiras Bolboreta.
19:30 h. Xogos Tradicionais Interxeracionais.
20:30 h. Recreación etnográfica da Malla.
21:15 h. Proxección audiovisual: “A construción dun carro galego”.
21:45 h. Concerto da Coral de Bóveda.
22:30 h. Degustación do “Isco no guizo”.
22:45 h. Noite de Pasodobre.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.