As Anpas galegas piden a Educación unha normativa específica para o alumnado con enfermidades de longa duración

A Confederación de Anpas Galegas pedirá este xoves á Consellería de Educación, ante a Comisión Permanente do Consello Escolar, a creación dunha normativa específica que "garanta o dereito fundamental á educación" do alumnado con enfermidades ou lesións de longa duración.

A confederación denunciou a "ineficacia da lexislación actual", que "resulta completamente insuficiente, tal e como manifestan as familias que padecen esta situación". O protocolo aprobado pola Xunta para estes casos, indican, "non modificou a situación preexistente nin solucionou a precaria situación".

Este xoves, a Comisión Permanente do Consello Escolar escoitará ao representante da Confederación de Anpas e decidirá se a proposta de instar á consellería a convocar unha mesa para redactar un proxecto normativo é levada ao Pleno.