O mércores 27 de xuño, ás 18.30 horas, os sindicatos recibían por fax unha comunicación da Consellaría de Cultura, Educación e Ordenación Universitaria onde se anuncia a suspensión do dereito de nomeamento nos meses de xullo e agosto para o persoal docente substituto que teña prestado servizos á administración durante, polo menos, cinco meses e medio durante o curso 2011-12. Esta suspensión esténdese tamén ao próximo curso 2012-13.

Para a CIG-Ensino, o sindicato maioritario no ensino público de Galicia, “é inaceptábel” que a Consellaría agarde ata unha data tan avanzada do curso académico para anunciar unha medida tan dura para o profesorado substituto. Educación acostuma a anunciar os recortes e outras medidas polémicas nos últimos suspiros do ano escolar, sabedora que a comunidade educativa ten complicado mobilizarse en vacacións.

A CIG-Ensino fai un chamamento a todo o profesorado afectado para que participe nunha concentración co obxecto de que o Conselleiro retire esta circular, que non pasou pola mesa sectorial (órgano de negociación onde deben ser tratados todo os asuntos que teñen que ver co profesorado). A concentración será na Consellaría de Cultura, Educación e Ordenación Universitaria da Xunta  (Edificio Administrativo San Caetano sn, Santiago de Compostela) este venres 29 de xuño ás 11.30 h.