Como adiantou GC, a posibilidade de que Alberto Nuñez Feijóo adiante os comicios a outono medra día a día. O presidente da Xunta negouse hoxe a falar de "quinielas" tras ser preguntado pola súa inminente viaxe a Sudámerica, que hoxe revelan varios medios de comunicación e blogs como Libertad Digital.

O presidente do PPdeG confirmou xa que viaxará polo menos ao Uruguai en xullo para, en teoría, impulsar o negocio dalgunha empresa galega. Fontes do PP tamén apuntan a que existen a posibilidade de que visite Brasil e Arxentina para visitar á colectividade de emigrantes.

Todos os presidentes da Xunta viaxaron a Sudamérica antes duns comicios. O propio Feijóo fíxoo cando era o candidato a derrotar a Emilio Pérez Touriño.

O motivo é o gran perso do Censo de Residentes Ausentes no censo galego. En 1986 o número de inscritos galegos no CERA era de 67.474 e a 1 de xaneiro de 2010 a cifra ascendía a 348.613.

Na actualidade o número de galegos con dereito a voto nas autonómicas son máis de 150.000 na Coruña, 135.000 en Ourense, 112.000 en Pontevedra e 54.000 en Lugo. Máis de 450.000 sufraxios potenciais que poden determinar o resultado das eleccións.

Na Coruña hai 636.000 galegos con dereito a voto, en Ourense 276.000, 779.000 en Pontevedra e 226.000 en Lugo. É dicir, que no país hai aproximadamente 1,9 millóns de electores.

Cuestionado polo motivo da viaxe, o responsábel de Emigración da Xunta, Santiago Camba, inistiu no seu alto contido empresarial. Agora ben, foi incapaz de precisar a que contido empresarial se refire. No Uruguai a presenza de empresas galegas é limitada e na Arxentina as relacións coas empresas do Estado Español non son as mellores tras a nacionalización de YPF. Cambia admitiu que Feijóo tamén terá axenda "institucional" fóra da económica, o que implica visitas aos centros galegos de emigrantes.