Corenta dias. Ese é o prazo para visibilizar e apoiar economicamente o proxecto de comunicación e información alternativa Galiza Contrainfo na rede. Dende o pasado venres 29 de xuño está en marcha unha campaña de crownfounding na plataforma en liña Verkami.

O obxectivo é conseguir 1.000 euros que serán destinados a pagar as multas impostas pola Subdelegación de Goberno de Pontevedra a catro activistas de Galiza Contrainfo cando estaban a realizar o seu labor informativo nunhas manifestacións. Os cartos tamén servirán para o mantemento da páxina web www.galizacontrainfo.org, onde se pode atopar todo o material realizado por este colectivo, ademais de videos doutros grupos afíns, videoclips, curtas e documentais. 

Aquelas persoas que colaboren co proxecto recibirán 'recompensas' como libros, cd, documentarios, postais, láminas, galicola, vales en tendas ou camisolas orixinais. 

Proxecto independente

Galiza Contrainfo é un grupo de persoas que traballan no campo do vídeo e foto-activismo para dar cobertura e difusión a aquelas realidades que os medios de comunicación empresariais silencian ou distorsionan. A idea é crear espazos de comunicación alternativa que acompañen aos movementos sociais do país (ecoloxismo, lingua, traballo, liberdade sexual, feminismo, migrantes, dereitos nacionais, etc.). Toda a produción audiovisual e fotográfica é difundida na rede, na páxina galizacontrainfo.org, baixo licencia copyleft que permite a re-utilización das imaxes en obras derivadas sempre que estas teñan un uso non comercial.

Financiación colectiva

Galiza Contrainfo precisa da colaboración de cidadáns e doutros colectivos para continuar co proxecto na rede e poder pagar os gastos de aloxamento da páxina e as multas que a Subdelegación do Goberno de Pontevedra puxo a catro membros de Galiza Contrainfo, o que provocou que o colectivo teña débedas importantes. Por iso, solicitan o apoio da xente que que considere a Galiza Contrainfo unha peza necesaria na construción dun espazo comunicativo galego que fuxa da información como espectáculo e do coñecemento como mercadoría.

Colaboradores

Galiza Contrainfo conta coa colaboración de colectivos sociais (Andaina, CS A Revolta, CUT, Galicola, Marcha Mundial das Mulleres), medios de comunicación (Galizalivre, Novas da Galiza) autoras/es e creadoras/es do mundo audiovisual, literario e teatral (A porta verde do sétimo andar, Alberte Momán, Andrea Núnes Brions, Begoña Caamaño, Berrobambán, Jose Manuel Nunes Vilar, Kiko Neves, Maria Lado, Mario Regueira, Marcos Nine, Rosa Enríquez, Sechu Sende, Sonia Daponte, Xosé Bocixa) e do mundo da música (Arenga, Ataque Escampe, Dandy Fever, Dakidarría, Keltoi, Kop, Marful, Nao, Propaganda pel fet, Roger de Flor, Skárnio, Zënzar), ademais de pequenos negocios de amigos (Bar Irmandinhos 13, D'Esguello, Minimarket24h, Sacauntos cooperativa gráfica).