Diante das durísimas medidas que vén de adoptar o Goberno, as tres organizacións sindicais CIG, CCOO e UGT acordaron convocar conxuntamente manifestacións cidadás o vindeiro xoves, día 19 de xullo, nas principais cidades e vilas galegas.

Todas elas discurrirán baixo o lema “Non ao saqueo do pobo. Hai que impedir que nos arruínen”. Subliñar que o acto central, ao que acudirán os secretarios xerais dos tres sindicatos, será na Coruña.

Os sindicatos denuncias que "as medidas están dirixidas a recortar, unha vez máis, dereitos e precarizar as condicións de vida e de traballo da maioría social, para que finalmente sexan as clases traballadoras quen paguen unha crise que non provocaron, ao tempo que se protexen e benefician os intereses de banqueiros, especuladores e defraudadores".

As centrais lembran que o Goberno impón a diminución da prestación por desemprego a partir dos seis meses do 60 ao 50%, así como, o endurecemento dos requisitos para o acceso á renda activa de inserción. Tamén incrementa os impostos indirectos subindo o tipo xeral do IVE do 18 ao 21% e o reducido do 8 ao 10%. Suprime a paga extra de Nadal das empregadas e empregados públicos e a súa negociación colectiva; reduce as empresas e fundacións públicas;  delimita a prestación de servizos por parte dos concellos, reforzando a cambio as deputacións; libera o sector servizos; privatiza os sectores de transporte ferroviario, portuario e aeroportos, entre outras.

Por iso, os sindicatos chaman a que a cidadanía galega poña de manifesto na rúa o seu rexeitamento, "tanto a estas políticas antisociais promovidas polo PP, como aos argumentos empregados para defendelos e a forma de escenificados".

O 19J será pois a primeira vez que os tres grandes sindicatos que hai en Galicia colaboran nunha acción global contra os recortes. Segundo confirmaron a GC fontes de UXT e CC.OO, sobre a mesa de diálogo está a posibilidade dunha convocatoria común de folga xeral en setembro.