A película xurde nun principio para amosar Etiopía, un país completamente descoñecido para a gran maioría da xente que vive ó norte e de costas ó continente africano. O coñecemento da realidade etíope é cada vez máis perentorio. Baste comentar como exemplo que Galicia, na última década, incrementou a súa poboación en máis de 700 nenos adoptados por familias galegas, precisamente cando as taxas de crecemento da poboación e renovación xeracional caen en picado.

O descoñecemento da realidade do seu país de orixe fai que xurdan estereotipos, tópicos e prexuízos na convivencia con eles que sería bo desterrar por anacrónicos.

Esta proxección de preestrea faise antes de que o filme comece a súa andaina pola temporada de festivais. Cabe destacar que o 10% dos beneficios que se obteñan da comercialización da película será entregado ao Padre Olaran en Wukro (Etiopía) para axudarlle a desenvolver o seu proxecto.

Para mais información, consulta a paxina www.ovidiofernandez.com. 

SINOPSE

Abdul, o protagonista, é un neno de 15 anos que vive en Galicia e que decide viaxar á súa terra despois de 4 anos residindo en Europa. O seu pai dálle un libro, Historia da Etiopia, escrito en portugués hai 400 anos polo frade castelán Pedro Páez. O rapaz empregará este libro como guía perseguindo os pasos do autor. Pouco a pouco a presenza da sombra, do espírito de Pedro Páez, faise máis real, máis latente. Tamén se vai facendo máis real, máis latente, Etiopía. A historia, planeada como viaxe iniciática, chega ó clímax cando finalmente descubre as fontes do Nilo, aquelas que Pedro Páez, 400 anos atrás, descubrira para o mundo. O simbólico bautismo naquelas augas funde lenda e realidade dun neno co seu país, co seu río, coa vida.

FICHA TÉCNICA

Duración: 101 minutos. Formato: H264. HD.

Protagonizada por: Abdul Fernández Fondevila Imaxe, guión e montaxe: Ovidio Fernández Sánchez Encargouse da produción Catarina Fernández Fondevila Asistencia ó guión: Xandra Tedín Mouzo, Ana Cadenas Pérez e Eva Sandino

Contou coa colaboración da Secretaría Xeral de Medios da Xunta de Galicia.

© 2012 Ovidio Fernández Sánchez

CURIOSIDADES DA VIAXE 

- Abdul, Catarina e Ovidio percorreron 3.800km nun 4x4.

- Iniciaron a viaxe en Addis Abeba o 27/07/2010, chegaron as fontes do Nilo o 17 de agosto e remataron a viaxe o 20/08/2010.

- A gravación fíxose especialmente dificultosa por coincidir coa época das choivas nese país.

- En Gorgora descubriron a única icona da que se teña constancia de Pedro Páez en Etiopía tras unha laboriosa busca.

- O título Shoots from Abyssinia recupera o vello nome de Etiopía, que 450 anos atrás lle puxeran os portugueses: Abissínia.

- Dada a ampla extensión do país e a riqueza e variedade cultural, deixouse o sur para unha segunda parte que xa está en proceso de edición.