Un golpe de efecto na rede. A páxina web Feijoo 2012 posiciónase en Internet para denunciar ao home que "se autoproclamou como abandeirado das políticas de austeridade do Partido Popular que agora está a practicar o seu aliado e compañeiro político Mariano Rajoy e que só están a derivar en recurtes sociais e na destrución masiva de emprego", denuncia a páxina.

Segundo os datos que ofrecen whois.domaintools.com e www.whois.net, o rexistro da páxina web fíxose, por un ano, o 21 de maio pasado a nome de Antonio Sangiao Novo, director de Pasquino Comunicación e ex-director de Xornal.com. Ademais, Sangiao fíxose cun dominio de gran cualidade como é feijoo2012.com, o que, sen dúbida, cuestiona a planificación, labor e previsións dos responsábeis da campaña de Núñez Feijóo na rede. 

A web, que leva por título "A verdade sobre o Goberno do PPdeG", denuncia unha serie de promesas incumpridas, segundo a páxina, como a solución ao problema do paro, os contratos con PEMEX, a sanidade, a lei de dependencia, as axudas a pais e nais, o medio ambiente, a redución dos impostos e do número de asesores ou o fortalecemento da economía. Así, até catorce áreas temáticas nas que se denuncian "as mentiras" de Feijóo.

Quen vén sendo Feijóo?

A web adica unha páxina a explicar quen é Alberto Núñez Feijóo, dividida en dous apartados: o primeiro, co título "Unha xestión nefasta", é unha cronoloxía interactiva na que se recollen algunhas das decisións e feitos máis negativos da xestión de Feijóo na Presidencia da Xunta; o segundo apartado, titulado "21 anos trepando na política", é unha descrición da súa traxectoria vital e política. 

Nesta biografía recórdanse momentos como cando o actual presidente da Xunta era un sindicalista que "defendía a estabilidade laboral para os interinos e contratados da Administración autonómica dende a Agrupación de Funcionarios Interinos e Contratados Administrativos (Fica)".

Tamén se fai mención a cando Feijóo participou no goberno popular de José María Aznar como secretario xeral de Asistencia Sanitaria, cargo no que participou, entre outros "fitos", na privatizacón da Sociedade Pública Estatal Correos e Telégrafos e "no 'medicamentazo' aprobado polo Partido Popular, un recorte que excluíu 854 fármacos da lista da Seguridade Social. Unha medida que se volveu repetir recentemente coa chegada de Mariano Rajoy á Presidencia do Goberno", denuncia a web.

A páxina tamén lembra que "dende que Feijóo preside a Xunta en Galicia hai 105.000 parados máis, a razón de 86 desempregados novos cada día".

Hai dúas seccións máis na páxina web Feijoo 2012: "Á vista está", na que se recompilan vídeos sobre o candidato do PPdeG, e "As desfeitas", unha recompilación de novas publicadas en diversos medios dende o 7 de outubro de 2009 e que comprometen a xestión do presidente da Xunta. Na portada da páxina web publícanse as "Últimas desfeitas", ademais dos "Últimos vídeos" do presidente da Xunta de Galicia.