"Non lle podo dar conta de información que non me consta e que non puiden comprobar ocularmente porque, sinxelamente, non coincidín para nada con eles". Así respondeu Alberto Núñez Feijóo ao ser preguntado na rolda de prensa posterior ao Consello da xunta pola visita que o presidente da Deputación de Pontevedra, Rafael Louzán, tres alcaldes; o das Neves, A Cañiza e Cambados, o delegado da Xunta en Pontevedra e o voceiro do PPdeG en Salceda de Caselas, realizaron a Arxentina, tal e como informou Galicia Confidencial. "Eu non coincidín cos alcaldes, coincidín nunha cea do Consello Galego da Emigración co presidente da Deputación, como tamén coincidín co presidente do Consello da Cultura Galega e co da Real Academia da Lingua", apuntou.

Sen embargo, aí acabou a súa resposta, porque da presencia do resto de cargos institucionais insistíu en que non sabía nada. "Non coincidín con eles", dixo en varias ocasións. Preguntado entón pola presencia dun membro do seu goberno respostoulle ao xornalista; "se vostede ten interés en que lle expliquemos a posible presencia do delegado da Xunta en Pontevedralla daremos nas próximas horas".

Visita privada

GC puxose, entón, en contacto coa Xunta para saber que facía alí José Manuel cores Tourís, o delegado do Goberno galego en Pontevedra, e a resposta foi que non estaba coma representante do Executivo autonómico, senón en visita privada. "Colleu unha semana de vacacións eses días", apuntan desde o Goberno galego.

Segundo puido saber este medio, Cores Tourís foi convidado polo alcalde de Cambados, Luis Aragunde, que acudiu a Arxentina a "interesarse" polos máis de 600 veciños que viven alí xa que, o agora membro da Xunta, foi o que iniciou e profundizou os contactos con este colectivo de emigrantes durante os seus anos como alcalde deste concello.

Deste xeito, tanto Aragunde coma Louzán, foron en visita institucional, pero non o resto de cargos populares. Na súa estancia en Arxentina Louzán reuniuse con empresarios, con membros da Federación de Sociedades Españolas e acudiu a festa de fin de ano organizada polo 'Centro Galicia'.

Visita a Uruguai

Tal e como publicamos en GCtv, Louzán tamén estivo en Montevideo, acompañado, entre outros por Cores Tourís e o alcalde da A Cañiza, Cesar Mera. Alí, ademais de reunirse coa colectividade, entregou un recoñecimento ao gaiteiro máis vello, Celestino Pichel.