A alcaldesa da Coruña di que non se entenderían "impedimentos" da Xunta á área metropolitana
"É un tempo novo", respondeu ao ser preguntada polo feito de que, no anterior mandato e co goberno de Marea Atlántica, esta proposta non tivese apoio do grupo municipal socialista.
Por E.P. | A CORUÑA | 25/09/2019 | Actualizada ás 17:09
A alcaldesa da Coruña, Inés Rei, mostrouse confiada en que a Xunta non poña "impedimentos" ao desenvolvo da área metropolitana coruñesa e confirmou que o goberno local levará á sesión plenaria do 3 de outubro a proposta "para a formulación dunha lei" para a súa creación.
Así o trasladou tras un encontro no Consistorio coruñés coas alcaldesas de Betanzos e Bergondo e os alcaldes de Abegondo, Oleiros, Sada, Cambre, Culleredo e Carral, ademais do rexedor do municipio arteixán.
"É un tempo novo", respondeu ao ser preguntada polo feito de que, no anterior mandato e co goberno de Marea Atlántica, esta proposta non tivese apoio do grupo municipal socialista. "O goberno que presido ten esta formulación", dixo ao defender o impulso da área metropolitana, asunto recolleito tamén no acordo con Marea Atlántica.
Preguntada pola posible resposta da Xunta, asegurou que "non se entenderían impedimentos a algo que mellora a vida dos cidadáns" e apelou ao "consenso" entre os rexedores a este respecto.
CONSORCIAR SERVIZOS
Mentres, o alcalde de Abegondo, José Antonio Santiso Miramontes, do PP, respondeu, ante a pregunta de por que con Marea Atlántica algúns alcaldes non asistiron ás reunións convocadas, que no seu caso non o fixo "porque non levaban a ningún lado". "Non había acordo na corporación coruñesa para iniciar a área metropolitana", dixo sobre o anterior mandato.
Tras esta reunión, a rexedora coruñesa volveu a insistir na conveniencia de consorciar servizos entre A Coruña e estes concellos, entre os que citou o tratamento de residuos, o transporte ou o abastecemento da auga.
