Ana Miranda ve "de xustiza" que Estrasburgo "recoñeza os dereitos laborais" do colectivo Long Hope

A portavoz do BNG en Europa, Ana Miranda, reiterou a solidariedade da súa formación co colectivo de mariñeiros Long Hope, e asegurou que é "de xustiza" que o Tribunal de Estrasburgo "recoñeza os seus dereitos laborais".

Ana Miranda lembrou que presentou xa diversas iniciativas na Eurocámara co obxectivo de que a Unión Europea "inste" os Gobernos de España e de Noruega a asinar un convenio bilateral, de carácter retroactivo, para garantir os dereitos dos traballadores afectados, que neste caso son máis de 12.000.

Noruega, lembrou Miranda, non recoñece as pensións de xubilación aos traballadores do mar embarcados nos seus buques ata 1994, por carecer de condición de residentes, aínda a pesar de pagar neste país os seus impostos.