O Goberno asegura que se fai "todo o posible" para axilizar o pago de prestacións dos ERTE

A vicepresidenta terceira do Goberno e ministra de Asuntos Económicos e para a Transformación Dixital, Nadia Calviño, asegurou este venres que "se está facendo todo o posible" para axilizar o pago de prestacións aos traballadores afectados por expedientes de regulación temporal de emprego (ERTEs).

Na rolda de prensa que ofreceu xunto á ministra de Facenda, María Jesús Montero, para dar conta do Plan de Estabilidade remitido a Bruxelas, Calviño fixo fincapé en que o establecemento das novas prestacións habilitadas para protexer as rendas dos cidadáns na crise supuxo un "esforzo importantísimo".

"Puxéronse en marcha novas prestacións para máis dun millón de autónomos e ao redor de tres millóns de traballadores en ERTEs están a recibir os pagos coa frecuencia máis rápida que se puido habilitar", subliñou a vicepresidenta económica, ao que a ministra Montero engadiu que se reforzou o persoal do SEPE para que estas prestacións "se poidan pagar á maior velocidade" e ninguén quede sen elas.

COMPASAR A DESESCALADA COS ERTEs

Doutra banda, Calviño reiterou que o Goberno está a traballar cos axentes sociais para ver de que modo hai que compasar o plan de desescalada cos ERTEs. "É un proceso complexo, porque temos que lograr incentivar a recuperación da actividade económica e incentivar a readmisión dos traballadores", indicou.

A vicepresidenta lembrou que a regulación dos ERTEs de forza maior aprobada na crise sanitaria leva un importante esforzo do sector público para salvar empregos, pois exonera de cotizacións ás empresas que se acollen a estes procedementos. "É un esforzo dos contribuíntes (...) e queremos acertar para que ese esforzo nos permita compasar a desescalada", explicou.

Traballadores do asteleiro naval Freire con máscara por temor ao coronavirus | Fonte: @miguelnuñez