Así será o desconfinamento das bibliotecas: préstamos "baixo demanda" e corentena para devolucións
Na segunda fase poderán facerse actividades de dinamización pero só para maiores de 12 anos e abriranse salas de lectura con aforamento limitado.
Por E.P. | SANTIAGO DE COMPOSTELA | 12/05/2020 | Actualizada ás 19:36
A reincorporación de sectores específicos da función pública como museos, arquivos e bibliotecas son obxecto de protocolos específicos, como así o demandaron os sindicatos, os cales aínda se negocian durante esta semana, na que a administración autonómica se atopa na chamada fase preliminar. Con carácter xeral, esta fase está a servir para definir os postos de traballo existentes, as súas características e as necesidades co horizonte da volta ao traballo presencial.
Unha vez finalizadas as actuacións preliminares, irán volvendo aos seus postos de traballo os empregados públicos que non poidan prestar as súas funcións de forma presencial, sempre en condicións de garantías sanitarias, segundo recolle o protocolo xeral da Xunta. No borrador do plan de desescalada para arquivos, museos e bibliotecas, ao que tivo acceso Europa Press, tamén se atopan especificidades.
No caso das bibliotecas, na primeira fase, que durará polo menos dúas semanas, o préstamo de libros "farase baixo demanda, sen acceso directo aos fondos", é dicir, as obras serán solicitadas polos usuarios e proporcionadas polo persoal da biblioteca. Para a devolución dos exemplares, procederase á descontaminación dos materiais a través dunha corentena de 14 días.
Son algunhas das medidas que recolle o borrador de protocolo, ao que tivo acceso Europa Press, e no que se inclúe que nas bibliotecas só se poderá ler e consultar en sala os fondos que non sexan susceptibles do préstamo domiciliario.
Na Biblioteca de Galicia e nas especializadas ou con fondos antigos, permitirase a consulta de publicacións excluídas do préstamo domiciliario con redución de acceso a un terzo da súa capacidade e só nos casos nos que se considere necesario.
ASESORAMENTO DIXITAL
Nesta primeira fase, de polo menos dúas semanas e que comezará o luns 18 se así se determina tras as actuacións preliminares, "non se realizarán actividades culturais, actividades de estudo en sala ou préstamo interbibliotecario", e tampouco se poderá facer uso dos computadores e medios informáticos das bibliotecas destinados para o uso público da cidadanía, así como tampouco dos catálogos de acceso público en liña ou fichas da biblioteca.
Durante este período, as coleccións en libre acceso permanecerán pechadas ao público. Pola súa banda, os servizos de préstamo dixital manteranse: asesoramento e recomendacións bibliográficas, biblioteca dixital de préstamo, GaliciaLe, biblioteca dixital patrimonial, Galiciana, información e referencia, atención ás redes sociais e contacto e seguimento de usuarios.
Nas bibliotecas estarán dispoñibles dispensadores de xeles hidroalcohólicos ou desinfectantes, haberá papel desbotable para limpar as mans dos traballadores para persoal e usuarios e os lugares de atención ao público disporán de medidas de separación entre os traballadores e os usuarios. Non estará dispoñible o servizo de consigna para as persoas visitantes.
ABRIRÁN SALAS DE LECTURA E DINAMIZACIÓN
Xa na segunda fase, prevista para dúas semanas máis tarde, haberá como novidade a posibilidade de lectura e consulta, previa cita, na sala específica habilitada para ese fin, cunha limitación da capacidade da sala, garantindo a distancia interpersoal entre usuarios de dous metros.
As persoas usuarias accederán a estas salas no horario de mañá ou de tarde, co fin de dar acceso ao maior número de persoas. Pero manterase a prohibición de acceso directo aos fondos que poidan estar situados nesta sala.
As actividades de dinamización cultural e bibliotecaria que organice o centro serán preferentemente dixitais e potenciaranse os clubs de lectura dixital.
Mentres, as de carácter presencial "que se poidan excepcionalmente organizar, garantirán sempre as distancias de seguridade e as medidas de protección adecuadas". A capacidade das salas limitarase a un terzo e non superará as 50 persoas.
En todo caso, só se poderán programar actividades de dinamización para maiores de 12 anos: conferencias, exposicións, clubs de lectura, actividades de formación de usuarios, etc.
Durante esta fase, poderanse prestar equipos telemáticos, se se dispón dun sistema de desinfección, e manteranse os servizos dixitais da anterior fase.
TERCEIRA FASE: USO DE DISPOSITIVOS ELECTRÓNICOS
Cando conclúa a segunda fase, que como mínimo será entre o 1 de xuño e o 14 dese mes, iniciaríase a terceira etapa deste protocolo, tamén con outras dúas semanas de duración, salvo que os criterios sanitarios determinen ampliala.
Durante este tempo, o préstamo mantense baixo demanda e os libros seguirán en corentena 14 días unha vez sexan devoltos. Abrirase o servizo de hemeroteca, se se dispón dun sistema de desinfección, con capacidade que estará delimitada pola distancia interpersoal.
Haberá acceso a todas as salas, respectando as medidas de seguridade e de distancia interpersoal. De existir fondos de acceso directo nestas salas, manterase a prohibición de consulta directa sen previa demanda ao persoal da biblioteca.
As normas para as actividades de dinamización seguirán sendo as mesmas que na fase dúas, aínda que se ampliará a capacidade das salas ata a metade do seu aforamento.
Nesta terceira fase, habilítase o préstamo intra e interbibliotecario, mentres que o uso de espazos comúns permitirase ata un máximo da metade da súa capacidade e sempre respectando a distancia de seguridade.
Nesta fase, as persoas usuarias poderán empregar os dispositivos electrónicos, computadores e medios informáticos do centro, garantindo a distancia interpersoal de dous metros, pero seguirá sen haber servizo de consigna para as persoas usuarias.
ARQUIVOS: DARÁN PRIORIDADE ÁS CUESTIÓNS XUDICIAIS
Nos arquivos seguiranse unhas normas moi similares. Así, primarase a atención telemática, salvo a imprescindible presencial, que se fará, en todo caso, con cita previa. Atenderanse de forma prioritaria as peticións de información e copias de documentos que deban achegarse en procedementos xudiciais ou administrativos.
