Ferrol recibirá 186.000 euros do Goberno central para reparar os danos causados polos temporais de 2019
A partida cobre a metade dos gastos dos arranxos nos pavillóns de FIMO e do reforzo dun noiro en Doniños.
Por E.P. | SANTIAGO DE COMPOSTELA | 29/07/2021 | Actualizada ás 13:15
O Goberno central concedeu ao Concello de Ferrol unha subvención de algo máis de 186.000 euros para cofinanciar as obras de reparación de danos causados pola sucesión de temporais do outono e o inverno de 2019, en concreto os arranxos en cubertas e fachadas do recinto de FIMO e o reforzo dun noiro en Doniños, informou o Consistorio este xoves.
Esta liña de axudas foi anunciada pola ministra de Política Territorial (agora na carteira de Sanidade), Carolina Darias, o pasado mes de setembro nunha visita á cidade, pouco despois de aprobarse un real decreto que ampliaba os fondos do ano anterior para sufragar reparacións por danos causados por temporais.
Para os arranxos de FIMO, o Executivo central destina algo máis de 105.000 euros, mentres que para a actuación no noiro de Doniños, que linda cun parque infantil e unha pista polideportiva, concedéronse 80.672 euros.
"OBRAS NECESARIAS"
En ambos os casos, explicou a concelleira de Obras e Servizos, Ana Lamas, nun comunicado de prensa, a contía cobre a metade do importe da actuación, o máximo subvencionable.
A edila agradeceu ao Ministerio "esta posibilidade de cofinanciamento para obras tan necesarias" en Ferrol, xa que permitirá ao Concello reservar parte dos seus fondos para seguir actuando en edificios de titularidade municipal.
