A trenza dunha nena de 7 anos datada de 1970, peza 15.000 do Museo do Pobo Galego
Por aquel entón era costume, cando alguén falecía, conservar obxectos do defunto para asimilar a perda.
Por Europa Press / Redacción | SANTIAGO DE COMPOSTELA | 02/09/2021 | Actualizada ás 18:30
A colección do Museo do Pobo Galego suma xa 15.000 rexistros coa incorporación da súa nova peza: unha trenza de cabelo dunha nena de 7 anos datada de 1970 e que foi doada pola súa familia. Nun comunicado, a entidade sinala que por aquela época, ante unha perda prematura dun fillo ou familiar, era costume para asimilar a situación conservar obxectos persoais do defunto.
Entre as posibilidades, o máis significativo era gardar o cabelo da falecida como unha forma de testemuñar a existencia desta persoa e conservar a esencia, posto que ademais non se degrada con facilidade. Neste caso, trátase do cabelo dunha nena que faleceu de forma súbita aos 7 anos, en Silleda, no ano 1970, e conservada pola súa nai en recordo da pena xunto cun escapulario.
Segundo relata a entidade, esta trenza serviu como elemento integrador familiar, especialmente para a descendencia do matrimonio, que non chegou a coñecer á súa irmá.
