O parkinson en Galicia: "se houbera cifra máis fiables os servizos públicos serían mellores"
Persoas con esta patoloxía mobilízanse na Coruña para demandar estudos máis actualizados sobre a afectación da enfermidade e novas políticas públicas.
Por E.P. | SANTIAGO DE COMPOSTELA | 11/04/2022 | Actualizada ás 14:50
Afectados de parkinson reclaman "a necesidade inminente de recompilar e pór a disposición púbica datos fiables e actualizados" sobre o impacto da enfermidade, así como do perfil da persoa afectada en base ao sexo, idade, procedencia e outros factores determinantes. En Galicia son máis de 13.000 as persoas afectadas.
Unha representación de enfermos de parkison e as súas familias sumáronse este luns, na praza de María Pita, na Coruña, á lectura dun manifesto co obxectivo de visibilizar esta enfermidade neurodegxnerativa e concienciar sobre as necesidades do colectivo. Á cita, organizada pola Federación Española de Parkinson, acudiu o director xeral de Maiores e Persoas con Discapacidade, Fernando González Abeijón; a alcaldesa da Coruña, Inés Rey, e representantes dos concellos da área metropolitana.
O membro da xunta directiva da Asociación Parkinson Galicia na Coruña José Miguel Andrade explicou que se trata dunha enfermidade crónica e neurodexenerativa que "se estima" que afecta a 1.300 persoas na provincia da Coruña, máis de 13.000 en Galicia, 180.000 en toda España e a máis de sete millóns de persoas en todo o mundo.
Ao fío diso, sinalou que a campaña 'A outra cara do parkinson' --lanzada en 2022-- persegue dar a coñecer unha imaxe "máis exacta e verdadeira" desta enfermidade que afecta "drasticamente" á calidade de vida da persoa afectada e de "toda a súa contorna".
"UNHA GRAN DESCOÑECIDA"
"Hai tanto parkinson como persoas afectadas", destacou Andrade, que insistiu en que esta enfermidade segue sendo "unha gran descoñecida" e é necesaria a obtención de "datos reais" sobre o número de persoas afectadas, o perfil sociodemográfico, así como a evolución e resposta aos tratamentos. Estes datos abrirían "multitude de portas", segundo explicou o portavoz, non só á investigación senón á posta en marcha de proxectos e á aplicación de políticas centradas "de verdade" na persoa.
No manifesto, recalcan, así,que contar con datos epidemiolóxicos "fiables" permitiría "corrixir" as actuais políticas sanitarias e sociais para que doten ás comunidades autónomas do orzamento "requirido" para cubrir os custos da atención sociosanitaria "integral e crónica" que precisan as persoas con parkinson, os seus familiares e coidadores.
A alcaldesa, pola súa banda, deu o seu apoio "incondicional" ás persoas e ás familias que padecen esta enfermidade e pediu unha "acción conxunta de todas as administracións", desde os concellos ata o Goberno, para que as peticións deste colectivo sexan atendidas "o máis rápido posible".
