A xerencia do CHUS busca reorganizar Medicina Interna tras dimitir o xefe de servizo
Este xoves pola mañá reuniuse a dirección do CHUS con seis internistas e analizaron "propostas organizativas para o servizo".
Por E.P. | SANTIAGO DE COMPOSTELA | 30/06/2022 | Actualizada ás 13:28
A xerencia da área Sanitaria de Santiago e Barbanza asegura que traballa para dispor "canto antes" de novo responsable para o Servizo de Medicina Interna do Hospital Clínico tras dimitir este pasado mércores o xefe de servizo do mesmo, Antonio Pose.
Así o afirmou este xoves a xerente da área Sanitaria de Santiago e Barbanza, Eloína Nuñez, en relación á situación do Servizo de Medicina Interna no CHUS. "A xerencia mantivo, mantén e manterá unha liña aberta para buscar solucións á situación do servizo", afirmou. Respecto diso, insistiu na "total dispoñibilidade para buscar solucións" en "todo momento". "E seguimos dicindo que nos reuniremos as veces que sexan necesarias. Esta xerencia escoitou as demandas dos profesionais e seguirao facendo", asegurou.
Sobre o sucedido esta semana, Eloína Núñez explicou que "o martes 28 de xuño" recibiron un escrito de Medicina Interna do CHUS e "inmediatamente a dirección convocou a estes profesionais a unha reunión ao día seguinte" ás 8,00 horas, á que, detallou, "acudiron 23 facultativos".
A xerente remarcou que nese encontro insistiron "nas medidas acordadas no ámbito galego entre a Consellería de Sanidade e os xefes de servizos de Medicina Interna de toda Galicia". "No transcurso desta reunión o xefe de servizo, que xa o luns me tiña notificado verbalmente a súa intención de xubilarse de inmediato, presentou a súa dimisión", puntualizou, para seguidamente "agradecerlle os servizos prestados".
ESFORZO
"Presentaremos proximamente ao xefe ou xefa de servizo provisional", asegurou a xerente da área compostelá, quen reiterou o "agradecemento aos profesionais deste servizo, un servizo fundamental, básico para o funcionamento do hospital, un dos que máis esforzo realizou e realiza pola pandemia polo coronavirus". Así mesmo, lembrou a "vontade de solucionar xuntos os problemas". "Esta mañá mantivemos unha nova reunión e seguimos traballando xuntos na procura de solucións", sostivo.
"Somos conscientes do gran traballo realizado por todos os profesionais e institucións sanitarias desde o inicio da pandemia, un sobreesforzo engadido e duro que se sostén no tempo desde hai dous anos e medio e que aínda continua", concluíu Eloína Núñez.
