A sombra de Picasso no Salón de Actos do Círculo de Artesáns da Coruña

Responsables de cultura do Círculo de Artesáns da Coruña descubriron ao autor das pinturas do teito do Salón de Actos --ata o momento descoñecido--, o pintor coruñés e mestre de Pablo Picasso, Román Navarro.

Segundo fixo pública a propia Sociedade nun comunicado, a autoría das pinturas era descoñecida e tampouco existía documentación coñecida sobre ese tema. Nin os socios nin o antigo aparellador, ao que se lle consultou o ano pasado e que participou na instalación do teito, sabían tampouco da identidade do autor.

Polos traballos que se realizan actualmente para a catalogación da Biblioteca, atopouse un volume editado en 1930 titulado 'Libro de Ouro da provincia da Coruña', no que se atopou un artigo do escritor Uxío Carré Aldado titulado 'A Reunión Recreativa e Instructiva de Artesáns'. Nese texto declárase que o autor das pinturas do teito foi Román Navarro, "un dos máis grandes pintores que naceron en Galicia".

Tal e como detallan, Román Navarro García-Vinuesa, profesor de Pablo Picasso, con obra exposta no Museo do Prado, foi "un dos máis significativos pintores galegos do século XIX e das primeiras décadas do século XX".

Román Navarro (A Coruña, 1854-1928) foi pintor, ilustrador, xornalista e militar galego. Destacou polos seus cadros de costumes, retratos, cadros de cabalos e as obras con escenas militares.

Foron alumnos seus pintores posteriormente recoñecidos como Pablo Picasso, Joaquín Vaamonde, Francisco Lloréns e Arturo Souto. Foi ademais retratista dos monarcas Alfonso XII e Alfonso XIII. Mesmo foi convidado por este último a ser o seu preceptor, "renunciando porque iso lle suporía vivir fóra da cidade da Coruña".

REHABILITACIÓN AUTONÓMICA E LOCAL

A Sociedade sinala no comunicado que o Círculo de Artesáns, que tamén estivo asociada á familia de Pablo Picasso na súa estancia herculina, podería ser unha das etapas do chamado 'Roteiro Picasso'.

Ademais, piden á Xunta e ao Concello da Coruña que se impliquen na limpeza e conservación do patrimonio artístico das pinturas do teito do Círculo de Artesáns, afectadas, aseguran, durante décadas polo fume de tabaco e "con algunha delas con certo grao de deterioración".

Pinturas de Román Navarro, mestre de Picasso, no Círculo de Artesáns da Coruña | Fonte: remitida