Galicia ten 182 monumentos vexetais, entre eles a camelia do Pazo de Lens cun valor de 1,6 millóns

Galicia conta con 182 monumentos vexetais que, nalgúns casos, superan un valor dun millón de euros. Este é un dos datos que dará a coñecer o presidente da Asociación Forestal de Galicia, Antonio Rigueiro, nunha nova conferencia que servirá para clausurar as 'XXXIII Xornadas Luís Asorey' organizadas pola Deputación de Lugo.

Así, o salón de actos da sede provincial acollerá, de 19,00 a 21,00 horas, o peche deste ciclo, que estivo composto por unha serie de conferencias gratuítas promovidas pola Real Academia Galega de Ciencias e a deputación, coa colaboración de Campus Terra da USC.

Nesta última charla da edición titulada 'O capital natural e os servizos ecosistémicos. A nova base da economía', Antonio Rigueiro, impartirá unha conferencia que porá en valor o patrimonio natural valioso que posúen as "árbores singulares" que hai en Galicia.

O catedrático explicará que, desde 2007, Galicia conta co 'Catálogo de Árbores Senlleiras de Galicia'. En palabras do protagonista, este é un "catálogo oficial de árbores e formacións sobresaíntes e insubstituíbles, que representan un patrimonio natural e cultural importante", patrimonio que se debe "protexer e pór en valor".

Nesta intervención analizará a evolución histórica da catalogación, da cal destacará algúns monumentos de especial significación. As provincias da Coruña e Pontevedra son as que máis elementos achegan a esta lista, que actualmente reúne en Galicia 182 monumentos vexetais: 144 árbores e 38 formacións ornamentais ou grupos de árbores.

Exemplares que teñen tamén unha valoración económica segundo a 'Norma Selecta', o método de valoración de arboredo monumental con máis difusión internacional en lingua española. Este método de tasación económica adquire unha gran importancia ao poder ser empregada en casos de expropiacións, para calcular a repercusión de catástrofes naturais ou para fixar indemnizacións por accidentes de tráfico ou vandalismo.

EXEMPLOS DE ÁRBORES 'MILLONARIAS'

O experto citará algúns exemplos destacados do catálogo como o castiñeiro de Pumbariños, situado en Manzaneda (Ourense), cun dos troncos de maior diámetro de Galicia (12,5 metros), o carballo de Cartellos en Carballedo (Lugo) ou un dos eucaliptos máis grandes de Europa, denominado 'o avó' (61,78 metros de altura), localizado en Viveiro (Lugo).

Tamén destacará aqueles exemplares con maior valor económico. A camelia, alcumada 'Pantalóns', do Pazo de Lens, situada en Ames (A Coruña) está valorada actualmente en 1.608.229,96 euros, cantidade que a converte no exemplar ornamental máis valioso de Galicia. No apartado de árbores, o castiñeiro de Soutogrande, en Vilariño de Conso (Ourense), ascende a 758.957,56 euros.