O novo director da Real Filharmonía de Galicia sinala que a música clásica "fai o pasado relevante para o presente"
Baldur Brönnimann incorporarase ao posto en xaneiro e o primeiro concerto será no mes de xuño
Por E.P. | SANTIAGO DE COMPOSTELA | 29/11/2022 | Actualizada ás 13:25
O novo director da Real Filharmonía de Galicia (RFG), Baldur Brönnimann, avanzou que comezará a súa andaina co obxectivo de achegar a música clásica a toda a sociedade, xa que cre que "ten cousas que achegar" ao período actual.
Brönnimann foi presentado este martes como novo director e asumirá o cargo en xaneiro de 2023 como substitución de Paul Daniel. Así, no acto detallaron que o contrato actual é de dous anos con posibilidade de renovarse por anualidades ata un máximo de cinco anos.
No acto, celebrado no Museo do Pobo Galego, participaron o alcalde de Santiago, Xosé Sánchez Bugallo, a directora técnica da RFG, Sabela García, e a xerenta do Consorcio de Santiago, Belén Hernández, que afirmou que o emprazamento escollido para esta presentación foi elixido polo propio director como "un lugar simbólico que representa a esencia e a modernidade da cidade".
Así, Brönnimann remarcou a ilusión coa que afronta este novo proxecto no que se ve "moi implicado", xa que se considera un "músico de hoxe" e cre que a música clásica "ten que achegar cousas ao período actual e fai o pasado relevante para o presente".
Nesta liña, detallou os diferentes ámbitos nos que centrará o seu traballo: a implicación social, na que remarcou as "ferramentas que lle brindan ao público para achegarse ás obras do pasado"; a calidade artística e a renovación do repertorio; e o compromiso formativo, xa que tanto a creación como a formación no tecido musical do mañá, sinalou, "é moi importante".
"Espero que no momento que coñeza mellor Santiago poida estender este traballo, ir onde está o público, non esperar a que el veña a nós e facer proxectos que de verdade impliquen á xente e poidan coñecer a música clásica", puntualizou o director.
Pola súa banda, a xerenta do Consorcio de Santiago incidiu en que esta nova etapa arrinca coa "sensación de ter unha folla de ruta, de ter os deberes feitos" e asegurou que teñen claro onde queren chegar.
"NON QUEDAR ANCORADOS NO PASADO"
Así, aludiu aos cambios sociais que se produciron nos últimos tempos, que esgrimiu que "non poden quedan ancorados no pasado" e teñen que "ser conscientes do que teñen ao redor".
Nesta liña pronunciouse tamén a directora técnica da RFG, que incidiu na importancia de que as institucións se "reinventen cada certo tempo, escoiten ao mundo, andar cos tempos e mostrar á cidadanía a importancia que ten a música como vehículo de cohesión, de benestar e de transformación social".
Pola súa banda, Bugallo remarcou que a oferta de "calidade" da música chegou a Santiago, primeiro, coa construción do Auditorio de Galicia, e segundo, coa propia creación da Real Filharmonía de Galicia. "A combinación destes dous elementos produciu un cambio radical con respecto ao panorama anterior", apuntou o edil.
Ademais, definiu ao novo director como un "músico clásico e moderno" co obxectivo de construír a orquestra do século XXI e que "non sexa unha orquestra duns cuantos", senón que o conxunto da cidadanía "véxaa como parte da súa actividade sociocultural". "Estou seguro de que poderás facer moitas cousas en Santiago", animou Bugallo ao novo director. Finalmente, a directora técnica avanzou que o primeiro concerto como director de Baldur Brönnimann será o próximo ano, en concreto, no mes de xuño.
O NOVO DIRECTOR
Brönnimann naceu en Suíza e formouse na Academia de Música da Cidade de Basilea e no Royal Northern College of Music de Manchester, onde posteriormente foi titor visitante de dirección.
Na actualidade, lidera a Sinfonietta de Basilea, orquestra na que terminará a súa etapa no próximo mes de xuño. Alí, dirixe programas que combinan obras contemporáneas co repertorio estándar, co que busca desafiar as convencións clásicas e explorar novas vías para a interpretación orquestral. Desta forma, segundo sinalou a RFG nun comunicado, é unha persoa "profundamente comprometida" coa relevancia da música clásica no século XXI.
