O PP reivindica as súas políticas para a mocidade con prazas en campamentos e axudas para o carné
BNG e PSdeG denuncian ausencia de política xuvenil.
Por Europa Press / Redacción | SANTIAGO DE COMPOSTELA | 13/06/2023 | Actualizada ás 13:01
A conselleira de Política Social, Fabiola García, reivindicou as medidas promovidas polo seu departamento para a conciliación, con actuacións como os campamentos de verán, nunha comparecencia no pleno do Parlamento galego no que, á súa vez, BNG e PSdeG reprocharon á Xunta a ausencia, sostiveron, de políticas para os mozos.
A isto, respondeu a conselleira con referencias ás axudas impulsadas para este colectivo a través de iniciativas para promover proxectos emprendedores ou tamén para que se saquen o carné de conducir.
Fíxoo nunha comparecencia, a petición propia, para informar sobre a campaña 'O verán que sempre vas lembrar' e que incluirá, segundo precisou, a oferta de máis de 11.200 prazas, 400 máis que o ano pasado, con propostas que pasan polos campamentos, minicampamentos ou intercambios con outras autonomías.
"A maior oferta de prazas da campaña de verán de todo o Estado", aseverou a conselleira, quen, entre outros datos, destacou o apoio económico para as familias numerosas ou para os menores tutelados e vítimas de violencia de xénero, sufragando en parte ou na súa totalidade a praza.
CRITICAS DE BNG E PSdeG
E é que o parlamentario do BNG Paulo Ríos Santomé asegurou, na súa intervención, que a Dirección Xeral de Xuventude é "na práctica, un fantasma". "Se quitamos esas políticas de conciliación, non hai políticas para a mocidade", engadiu en referencia aos mozos de máis de 15 anos. Tamén requiriu información sobre o tipo de contratos que se fai aos mozos que traballan nos campamentos, á vez que acusou á Xunta de "vetar" a participación destes en organismos destinados a este colectivo.
En similares termos, a deputada socialista Noelia Otero manifestou que "non existe un modelo de lecer para a mocidade, nin un modelo de participación". "Lamentamos que o esforzo da Dirección Xeral de Xuventude limítese a que veña unha vez ao ano a falar de campamentos e minicampamentos, pouco máis hai", sentenciou.
