A Xunta nega que Beatriz Mato participase na tramitación de eólicos de Greenalia, unha "porta xiratoria" para o PSdG
O socialista Pablo Arangüena apuntou á Consellería de Medio Ambiente como principal responsable da "malleira xudicial" que reciben por parte do alto tribunal galego "ao omitir a normativa ambiental elemental".
Por Europa Press / Redacción | SANTIAGO DE COMPOSTELA | 30/06/2023 | Actualizada ás 15:17
O director xeral de Planificación Enerxética, Pablo Fernández Vila, negou este venres ante o Parlamento calquera tipo de participación da exconselleira da Xunta, Beatriz Mato, na tramitación de proxectos eólicos de Greenalia, empresa da que agora é directiva e o que para o PSdeG supón unha "porta xiratoria".
"Escoitar esas declaracións podería considerarse unha falta de respecto. Non, a exconselleira Beatriz Mato non participou en ningunha tramitación. Os expedientes de Greenalia son examinados por persoal técnico", aseverou o director xeral.
Doutra banda, o portavoz de Medio Ambiente do Grupo Socialista, Pablo Arangüena, responsabilizou ao Goberno galego de "provocar inseguridade xurídica" ao autorizar parques eólicos en base a Declaracións de Impacto Ambiental (DIA), "que omiten a normativa e provocan a súa paralización polo TSXG".
O socialista apuntou á Consellería de Medio Ambiente como principal responsable da "malleira xudicial" que reciben por parte do alto tribunal galego "ao omitir a normativa ambiental elemental". Mencionou tamén os parques situados na reserva da biosfera Mariñas Coruñesas - Terras do Mandeo, en plena zona de protección, "cun impacto ambiental elevado" pero que conseguen a DIA favorable.
O director xeral, pola súa banda, defendeu o traballo dos técnicos, que se cinguen a procedementos de acordo á lei. Así, lembrou que dos parques autorizados, reduciuse a potencia en 24. En total, reducíronse máis de 1.150 megawatios tras a avaliación ordinaria. Así mesmo, puntualizou que declarar un proxecto como de especial interese, "non supón eludir ningunha tramitación".
Nesta liña e en canto a Greenalia, remarcou que dos 15 proxectos declarados, hai oito en plena tramitación e do sete restantes, un deles xa obtivo unha DIA negativa. "Ese proxecto non se desenvolverá", afirmou, lembrando ademais que Greenalia ten un total de 10 declaracións desfavorables.
