Greenalia presume de que duplicou beneficios coa súa "enerxía vede" en 2022
Gañou 157 millóns.
Por Europa Press / Redacción | SANTIAGO DE COMPOSTELA | 31/07/2023 | Actualizada ás 18:03
Greenalia pechou o 2022 cunha produción enerxética total de 495.689 MWh, o equivalente ao consumo de 141.000 fogares, o que significa un incremento dun 59% con respecto a 2021, segundo informa. "Unha produción verde que permitiu aforrar a emisión de 183.000 toneladas de CO2 á atmosfera", remarca a compañía nun comunicado.
Ademais, afirma que a actividade xerada polas diferentes instalacións en operación (eólica e biomasa) supuxo unha cifra de negocio superior aos 95 millóns de euros, un 116% máis que o ano anterior, e un Ebitda próximo aos 65 millóns de euros.
O balance anual da compañía, feito público hoxe, "reflicte que o impacto económico directo da súa actividade empresarial na cadea de subministración foi de 157 millóns de euros, distribuídos principalmente polo territorio da península ibérica, sendo as empresas localizadas na rexión onde se sitúan os proxectos as máis beneficiadas", engade.
Respecto diso, apunta que recibiron un 39% destes ingresos, o que se traduce nun impacto económico de 63 millóns de euros, un 40% máis que en 2021, e permitiron mobilizar 180 empregos nas comunidades locais nas que se desenvolven os proxectos.
A empresa completou o ano pasado o seu plan de negocio previsto para os anos 2017-22. Actualmente, apunta, está inmersa na definición do seu novo plan estratéxico cos retos de expansión xeográfica e novos desenvolvementos tecnolóxicos como principais eixos.
