As feiras do libro de Galicia pechan catro meses de actividade coa de Monforte, entre o 23 e 26 de agosto
O pregón correrá a cargo do escritor Francisco Narla.
Por Europa Press / Redacción | SANTIAGO DE COMPOSTELA | 21/08/2023 | Actualizada ás 13:31
As feiras do libro de Galicia pechan catro meses de actividade coa de Monforte, que terá lugar entre o 23 e o 26 de agosto na rúa do Cardeal, segundo informa a organización. Seis casetas, ducias de autores, eventos para toda a familia, firmas e presentacións darán por finalizada a tempada de feiras de 2023.
E é que Monforte será o escenario da última feira do libro en Galicia, que incluíron programas de actividades para todos os públicos e de encontro con autores. En concreto, esta feira dará comezo ás 19.00 horas do mércores 23 de agosto co pregón do escritor Francisco Narla, encargado de abrir a cita coa que conclúen as 14 feiras do libro na comunidade autónoma.
