Falta de man de obra, a gran problemática do sector do transporte en Galicia

A conselleira de Promoción do Emprego e Igualdade, Elena Rivo, mantivo este venres unha reunión coa secretaria xeral da Asociación empresarial de transporte de mercadorías por estrada de Galicia (Apetamcor), Myriam Otero, na que analizaron as demandas do sector do transporte, centradas na escaseza de profesionais.

Tal como recolle a Xunta nun comunicado, Rivo recolleu as necesidades do sector e comprometeuse a estudalas, sendo unha das principais reivindicacións a falta de man de obra. O Goberno galego destacou que, para optimizar e facilitar o encontro entre a oferta e a demanda de emprego, están a modernizarse as oficinas de emprego cunha nova tecnoloxía baseada en intelixencia artificial, que axusta os perfís dos candidatos ás vacantes existentes.

Ao encontro tamén acudiron un grupo de profesionais de Perú, contactados en orixe por unha empresa do sector. Estes condutores están a formarse en Galicia para poder establecer aquí o seu proxecto vital e cubrir as vacantes que non é posible atender con profesionais da Comunidade.