Mar afea que os ministros "veñan sacar a foto" e non declaren a zona catastrófica nos bancos marisqueiros
Alfonso Villares criticou ao Goberno por ter a solicitide da Xunta "enriba das mesas".
Por Europa Press / Redacción | SANTIAGO DE COMPOSTELA | 07/02/2024 | Actualizada ás 18:36
O conselleiro do Mar, Alfonso Villares, criticou a presenza do ministro do Interior, Fernando Grande-Marlaska, e da ministra de Inclusión, Seguridade Social e Migracións, Elma Sainz, aos que lle lembrou que o Goberno central ten "enriba das mesas", desde o pasado 20 de decembro, a solicitude da Xunta para que se declare como zona catastrófica os bancos marisqueiros.
Así o declarou Villares este mércores durante a visita ás instalacións de conxelados Sariego no concello lucense de Rábade. Desta forma, sinalou que o Executivo galego e o sector marisqueiro "segue esperando" unha resposta por parte do Estado a unha demanda que permitiría habilitar axudas extraordinarias para "compensar de forma completa e áxil" ao sector.
"A preocupación demóstrase con feitos e non con boas palabras", reflexionou á vez que ironizou con que, case dous meses despois, "en plena campaña electoral por fin danse conta en Madrid da gravidade da situación sen aínda manifestar ningún compromiso concreto co sector".
Villares confrontou "a pasividade" do Executivo central co traballo realizado desde a Xunta da man do sector habilitando catro millóns de axudas directas aos profesionais que "abonarán de forma extraordinaria e directa" este febreiro e máis de 10 millóns de euros, irán a cargo de Fempa para "afrontar as paradas temporais".
