Declaran de interese público un parque eólico entre Mazaricos e Dumbría para facilitar as expropiacións de terreos
Establécese que nas parcelas nas que non se chegue a acordo entre promotora e titulares durante o procedemento expropiador, fixaranse as compensacións correspondentes de acordo coa lexislación.
Por Europa Press / Redacción | A CORUÑA | 01/03/2024 | Actualizada ás 13:00
A Xunta declarou de utilidade pública o proxecto eólico chamado A Ruña II, entre os municipios coruñeses de Mazaricos e Dumbría, para facilitar as expropiacións de terreos e decretar a compatibilidade con aproveitamentos forestais de diferentes montes veciñais. Así figura na resolución publicada este venres no Diario Oficial de Galicia (DOG) dun acordo do Consello da Xunta do pasado 15 de febreiro. Contra esta decisión, que pon fin á vía administrativa, pódese interpor recurso no prazo dun mes.
En concreto, establécese que nas parcelas nas que non se chegue a acordo entre promotora e titulares durante o procedemento expropiador, fixaranse as compensacións correspondentes de acordo coa lexislación. De tal forma, este anuncio no DOG inclúe un anexo de terreos afectados polo parque eólico en ambos os municipios.
Por outra banda, a Dirección Xeral de Planificación Enerxética e Recursos Naturais saca a información pública a autorización administrativa previa e de construción, así como o estudo de impacto ambiental, da repotenciación do parque eólico Sotavento, entre os municipios de Monfero e Xermade. Esta repotenciación está impulsada por Sotavento Galicia e prevé o desmantelamento de seis antigos aeroxeradores para a instalación de dous novos, cunha potencia instalada total de 22,6 megawatts. O orzamento de execución é de 7,5 millóns de euros (sen IVE).
