Rescatan na Pobra de Trives a un home que se desorientou mentres practicaba esquí
Non sabía onde se atopaba debido á néboa e á acumulación de neve.
Por Europa Press / Redacción | OURENSE | 16/03/2024 | Actualizada ás 19:43
O Grupo de Rescate Especial de Intervención en Montaña de Trives rescatou a un home que se desorientou este sábado cando se atopaba practicando esquí. Segundo informou o 112 Galicia, foi o propio implicado o que contactou coa central de emerxencias ao decatarse de que non sabía onde se atopaba debido á néboa e á acumulación de neve.
Con esta información, os operadores do 112 deron aviso á Garda Civil de Ourense, ao GES e a Protección Civil da Pobra. Así mesmo, desprazáronse ata o lugar membros do Grupo de Rescate Especial de Intervención en Montaña de Trives (Greim), que foron os que localizaron ao home. O 112 destacou que debido á dificultade que entrañaba a zona na que se atopaba, o traxecto ata as instalacións da estación de esquí demorouse máis do previsto, aínda que non se rexistraron incidencias.
