Condena ao alcalde de Dozón pola morte dun traballador na empresa onde era conselleiro delegado
O encargado da empresa tamén é condenado por un delito de homicidio por imprudencia á pena dun ano e sete meses de cárcere. Tamén se impón o pago dunha indemnización a familiares do falecido que suma máis de 400.000 euros
Por Europa Press / Redacción | PONTEVEDRA | 19/06/2024 | Actualizada ás 17:55
O Xulgado do Penal número 1 de Pontevedra condenou ao actual alcalde do municipio pontevedrés de Dozón, Adolfo Campos, pola morte dun operario na empresa na que era conselleiro delegado en 2020, Frigodeza. Tamén se condena ao encargado da mesma nun fallo contra o que cabe recurso.
Os feitos, segundo recolle a sentenza, producíronse o 5 de agosto dese ano na empresa Frigoríficas do Deza, dedicada ao sacrificio de porcos e que contratou a unha empresa de Lalín para reparar unha apertura nunha nave situada nesta localidade pontevedresa.
O falecido e un compañeiro desprazáronse á nave e o encargado de mantemento indicoulles o elemento que debían reparar, que era a apertura hidráulica da entrada de porcos á gaiola de anestesiado, onde comezaron os traballos de soldadura.
"O acusado tiña pleno coñecemento de que existía CO2 na zona de traballo e, a pesar diso, antes da intervención dos traballadores, non comprobou o nivel de acumulación de CO2 residual nin extraeu o mesmo a través do sistema de extracción", recolle a sentenza. Finalmente, un dos operarios, tras entrar e saír varias veces e notar problemas ao respirar, acabou falecendo.
"O traballo iniciouse sen que, previamente a iso, a empresa Frigodeza e, no seu nome, o conselleiro delegado da entidade, comunicase os riscos propios do centro de traballo que ían afectar ás actividades a desenvolver, as medidas de prevención de tales riscos e as medidas de emerxencia que se debían aplicar, de modo que, por tal falta de comunicación, os traballos de soldadura realizáronse mediante un procedemento absolutamente inadecuado", recolle o fallo.
Ao entón conselleiro delegado e actual rexedor de Dozón, o xulgado condénalle por un delito contra os dereitos dos traballadores por imprudencia grave ás penas de cinco meses e 15 días de prisión e por un delito de homicidio por imprudencia grave a un ano e sete meses.
Ao encargado, condénaselle por un delito de homicidio por imprudencia á pena tamén dun ano e sete meses de cárcere. Tamén se impón o pago dunha indemnización a familiares do falecido que suma máis de 400.000 euros.
