A borrasca 'Aitor' deixa árbores caídas e inundacións nunha primeira xornada con refachos de vento de ata 127 Km/h

A primeira borrasca do outono, chamada 'Aitor', acompañada dun río atmosférico desde latitudes tropicais azoutou este mércores Galicia con fortes ventos e choivas que deixan un regueiro de 160 incidencias. Segundo informa o 112 Galicia, caídas de árbores, desprazamento polo vento de mobiliario urbano, inundacións e bolsas de auga que provocan problemas na circulación foron as principais incidencias, principalmente nas provincias da Coruña e Pontevedra. Non entanto, non se rexistrou ningunha persoa ferida.

O número de chamadas atendidas polo 112 Galicia foi aumentando preto das 15.00 horas, cando comezaron a producirse as primeiras comunicacións de usuarios que ían atopándose con árbores caídas e bolsas de auga. Ao redor das 20.00 horas, xa se superaron as 2.000 chamadas. Por provincias, A Coruña (64) e Pontevedra (63) foron as que acumularon as cifras máis altas de intervencións dos recursos de emerxencias, seguidas de lonxe por Lugo e Ourense.

Por concellos, destacou o elevado número de incidencias na circulación en Santiago de Compostela e Vigo, con 19 e 15 incidencias, respectivamente. Este episodio meteorolóxico adverso continúa ata a tarde deste xoves, 26 de setembro. A Xunta recomenda circular con precaución e informarse antes do estado das estradas, non atravesar zonas alagadas e non aparcar na beira dos ríos.

FORTES VENTOS E CHOIVAS

Nunha xornada de alerta laranxa en varias zonas da comunidade, en Penedo do Galo, no municipio de Viveiro, rexistrouse o maior refacho de vento do día: 127 quilómetros por hora. Séguenlle os 115,9 quilómetros por hora de Punta Candeira, en Cedeira. No tocante a máximas por choivas, o municipio coruñés de Lousame acumula 84 litros por metro cadrado, con municipios como Santa Comba e Cuntis por enriba dos 60 litros. Estes fenómenos meteorolóxicos adversos obrigaron a pechar varios parques en cidades como A Coruña, Santiago e Lugo esta tarde de mércores.

AFECTACIÓN A SERVIZO MARÍTIMO

A circulación marítima tamén se viu afectada e a navieira Mar de Ons, debido ás condicións meteorolóxicas, cancelou o servizo entre Cangas e Vigo. Por tanto, a última saída foi ás 17.30 horas desde Cangas e ás 18.00 horas desde Vigo.

CORTES DE LUZ

En Santiago de Compostela rexistrouse un corte de luz sobre as 14.00 horas na zona do Parlamento de Galicia. A incidencia, que durou uns minutos, foi rexistrada como unha desconexión temporal por Naturgy, da que non se detectou a causa. Este feito motivou que varios dos edificios da contorna do Pazo do Hórreo estivesen sen luz uns minutos. Con todo, o fallo non afectou á actividade lexislativa, que continuou con normalidade tendo en conta que o edificio conta cun sistema de emerxencia propio.

ALERTA LARANXA ATA A TARDE DO XOVES

Así, a primeira borrasca do outono, 'Aitor', activou o aviso laranxa por choivas e fortes ventos no interior da provincia de Pontevedra e na provincia da Coruña, así como no litoral atlántico. Pola súa banda, o resto da comunidade estará en alerta amarela por fortes ventos e precipitacións ata a tarde deste xoves.