O mal tempo e a velocidade están detrás do accidente no que morreron dúas mulleres

Dúas persoas faleceron e catro resultaron feridas, entre elas un menor, tras chocar tres vehículos en Mugardos, concretamente á altura do quilómetro 1,1 da estrada AC-123, no límite co municipio de Ares. O mal tempo e a velocidade inadecuada dun dos vehículos pode estar detrás deste grave accidente.

O sinistro ocorreu sobre as 22,00 horas deste mércores, e nel víronse involucrados un Seat León, un Citroën C-15 e un Hyundai Kona. As dúas persoas falecidas, dúas veciñas de Mugardos de 60 e 26 anos de idade, viaxaban nos dous primeiros vehículos.

Segundo a Garda Civil, todo apunta a que o accidente se produciu cando o Seat León invadiu o carril contrario a unha velocidade inadecuada o que, sumado ás condicións da vía e a choiva, levouno a chocar cos outros dous vehículos que ían en sentido contrario. Por outra banda, as probas de alcoholemia practicadas aos condutores do Seat León e Hyundai Kona deron negativas.

Á zona desprazáronse os profesionais do GES de Mugardos, que demandaron a colaboración dos Bombeiros de Ferrol para facilitar os labores de excarceración de falecidos e feridos. Igualmente participaron no operativo axentes da Garda Civil e profesionais de Urxencias Sanitarias

Así mesmo, o 061 mobilizou unha ambulancia de soporte vital avanzado, dúas ambulancias asistenciais e persoal da PAC de Fene. Alí foron atendidas seis persoas, dúas das cales, das que non constan datos polo momento, resultaron falecidas.

Outras catro persoas, un home de 20 anos de idade, P.R.C.; un home de 33 anos, A.N.R.; outro home de 21 anos, D.L.F.; e un menor, foron evacuados ao Hospital Arquitecto Marcide de Ferrol..