O PSdeG esixe á Xunta unha planificación "seria" para as renovables en Galicia
Os socialistas advirten que a inacción do Goberno galego pode comprometer o futuro dunha industria clave para Galicia.
Por Europa Press / Redacción | Santiago de Compostela | 27/09/2024 | Actualizada ás 14:08
O PSdeG esixiu este venres á Xunta que poña en marcha unha planificación "seria" para garantir o despregamento das enerxías renovables en Galicia. Nunha rolda de prensa, o eurodeputado Nicolás González Casares e a parlamentaria Patricia Igrexas criticaron a inacción do Goberno galego neste eido, advertindo que, de non actuar, podería "arruinarse" o potencial dunha industria fundamental para a comunidade.
Patricia Igrexas destacou que, tras rexeitar inicialmente as propostas socialistas no Parlamento, a Xunta anunciou recentemente que comezará a traballar na planificación das enerxías renovables, algo que o PSdeG levaba reclamando dende hai meses. Pola súa banda, González Casares lamentou que a conselleira de Medio Ambiente, Ángeles Vázquez, realizase unha xestión "desafortunada" ante o Tribunal de Xustiza da UE, o que segundo el, xera "inseguridade e incerteza" nas institucións europeas.
Ambos representantes do PSdeG instaron á Xunta a adaptar o marco normativo galego ao europeo para axilizar os permisos e mellorar a planificación, con especial coidado na avaliación ambiental. González Casares sinalou que a falta de transparencia do Goberno galego dificulta a transición ecolóxica e crea inquietude entre a cidadanía.
Igrexas tamén denunciou a "parálise" do sector eólico en Galicia, afectando a 65 parques eólicos bloqueados polo Tribunal Superior de Xustiza de Galicia por cuestións ambientais. A parlamentaria subliñou que o plan sectorial de 1997 está desactualizado e que outras comunidades autónomas, como Aragón e Castela e León, xa avanzaron en novas planificacións, mentres que a Xunta segue sen ofrecer políticas claras no ámbito das enerxías renovables.
