Temas: MUROS TEMPORAL GALICIA KIRK LUZ ELECTRICIDADE COSTA

(Galería) O impacto de Kirk en Galicia: inundacións, tellados e árbores arrincadas e moito caos

Houbo case 600 incidencias e Pontevedra é a provincia máis afectada con 304.

Kirk deixa tamén críticas a Xunta pola falta de previsións: "Quedou de espectadora"
(VÍDEOS) Kirk provoca numerosas inundacións: Ponte Caldelas, Abadín, Outes, Rianxo...
Kirk deixa a Galicia sen varios trens, avións e con refachos de vento de 150 km/h

Por Galicia Confidencial | Compostela | 09/10/2024 | Actualizada ás 09:22

O impacto de Kirk en Galicia está deixando grandes incidencias en Galicia. Ventos de máis de 150 quilómetros por hora en puntos da costa e do interior, ademais de intensas choivas. O temporal deixa inundacións, cortes de electricidade, numerosas árbores e muros caídos e moitas inundacións en baixos e vivendas.

Tamén hai problemas no transporte, con varios trens afectados por incidencias nas vías, e estradas cortadas por inundacións ou caída de árbores.

CASE 600 INCIDENCIAS

A central de emerxencias contabiliza en case 600, a maioría asociadas a desprendementos, estradas cortadas pola caída de árbores e inundacións. Segundo o balance ofrecido pola Axencia Galega de Emerxencias, entre a tarde do martes e as 11,00 horas deste mércores o 112 atendeu 565 incidencias asociadas aos fortes ventos e as intensas precipitacións. Ningunha delas causou feridos.

A maioría dos problemas reportados ao 112 están asociados a estradas cortadas por caídas de árbores, ramas e outros obxectos. Ata o momento, cóntanse 355 por árbores sobre as vías, 44 por obxectos e 34 por cables, postes de luz e teléfono.

Ademais, houbo 44 accións preventivas dos equipos de emerxencias para retirar vexetación e obxectos inestables, unha ducia de desprendementos de terra e pedras, 13 caídas de carteis e sinais e doce por elementos procedentes de tellados e fachadas.

Pontevedra é, ata o momento, a provincia máis afectada con 304 incidencias, con Vigo á cabeza con 53, entre elas, a caída dalgúns elementos da iluminación do Nadal que xa coloca a cidade olívica desde hai aproximadamente un mes. A Estrada (23), Pontevedra (23), Nigrán (18) ou Ponteareas (13) son outros dos municipios que máis problemas rexistraron.

Na Coruña se contibilizan 162 incidencias, 20 delas en Santiago, as máis destacadas, os desprendementos do tellado do conservatorio de música ou o desprendemento de elementos nun edificio do rúa do Preguntoiro. En Padrón, 'Kirk' deixa unha ducia de problemas, a maioría, inundacións polo desbordamento do río Sar.

Na provincia ourensá, o 112 xestionou 50 incidencias con Celanova (6) e O Bolo (4) con puntos máis afectados, mentres que en Lugo houbo 42, coa capital á cabeza (4) xunto con Guitiriz (4).

CAÍDA DE ÁRBORES

O resto de sucesos protagonízanos a caída de árbores e a inundación de estradas pola acumulación intensa de precipitacións. Así, en Vigo, no Paseo de Granada, unha árbore caeu sobre dous vehículos, provocando danos materiais. Na Rúa Falcoido, outra árbore obrigou a cortar un carril de circulación e o mesmo ocorreu no Castro, á beira do Conservatorio, e na Avenida da Ponte.

En Santiago, árbores obstaculizaron o tráfico na Avenida de Lugo e Avenida Castelao; algo que tamén ocorreu en diversos puntos de Cambre e Culleredo (A Coruña), entre outros lugares. Ademais, un desprendemento de terra provocou retencións no corredor Noia-Santiago.

Os fortes refachos de vento tamén provocaron cortes de luz en diferentes puntos da xeografía galega, especialmente nas provincias de Pontevedra e A Coruña.

RÍOS EN RISCO DE INUNDACIÓN

Ademais, once ríos están en vixilancia por risco de desborde tras as fortes choivas das últimas horas que xa provocaron inundacións nas canles do Verdugo ao seu paso por Ponte Caldelas, o Anllo, en Moncelos --Vilalba-- e o Sar, en Padrón.

Dentro do Plan de seguimento e control dos caudais dos ríos (Plan Inungal), a central de emerxencias vixía especialmente os ríos Tambre, Mandeo, Mendo e Dubra --na provincia da Coruña--, o Verdugo, Lérez e Tea --en Pontevedra--, e Landro, Ladra, Masma e Ouro --en Lugo--.

A Axega apela a reducir o paso e a presenza tanto de persoas como de vehículos á beira destes cursos, así como abandonar calquera actividade fluvial que poida comprometer a nosa seguridade.

TEMPORAL DIFÍCIL DE VER

A borrasca ex-Kirk provocou un temporal difícil de ver "de forma tan masiva en toda Galicia" debido a "a combinación de vento e choiva" de forma "curta no tempo" no catro provincias.

En declaracións a Europa Press, o coordinador de Meteogalicia, Juan Taboada, expón que "entre as 8,00 e as 10,00 horas do centro da borrasca de Kirk" estaba máis preto de Galicia.

Explica que aínda haberá que comparar con rexistros para saber o grao na serie histórica, aínda que remarca que "en outubro non é fácil bater unha marca de precipitación porque é un mes un moi chuvioso".

Taboada explica que foi un episodio "bastante homoxéneo" en todo o territorio galego "ao rexistrar entre as 6,00 horas da madrugada e as 10,00 da mañá as máximas de choiva e vento".

As máximas rexistradas da xornada foron os 181 quilómetros por hora de Lardeira, en Carballeda de Valdeorras, así como os 120 litros por metro cadrado en Muralla, Lousame, e 117 litros por metro cadrado en Forcarei.

Xa o venres chegará outra borrasca a Galicia, "pero desde o sur", polo que "o normal é que estea por baixo dos niveis de aviso" e prevese "un día de choiva no outono", "con choiva a partir de mediodía do venres e ata o sábado".