O SERGAS porá en marcha un protocolo para reducir a mortalidade do shock cardioxénico
O procedemento unificará criterios clínicos de detección precoz, buscará unha atención máis rápida e eficiente
Por E.P. | SANTIAGO DE COMPOSTELA | 16/10/2024 | Actualizada ás 17:59
O conselleiro de Sanidade, Antonio Gómez Caamaño, avanzou este mércores que o Servizo Galego de Saúde (Sergas) contará en novembro cun protocolo unificado de asistencia para reducir a mortalidade en casos de shock cardiogénico.
Anunciouno durante unhas xornadas celebradas este mércores, Día da Parada Cardíaca, na sede da Consellería, no barrio compostelán de San Lázaro, ás que tamén asistiu o director xeral de Asistencia Sanitaria, Alfredo Silva Tojo.
Gómez Caamaño resaltou que, con este procedemento único, Galicia "volve ser pioneira" na creación dunha rede e na protocolización da atención dunha enfermidade da que o Sergas atendeu a máis de 2.800 pacientes desde o ano 2016.
O procedemento unificará criterios clínicos de detección precoz, buscará unha atención máis rápida e eficiente, optimizará o uso dos dispositivos de asistencia circulatoria e incorporará ao 061 en caso de traslados que sexan emerxencias.
