Pluralidade, democracia interna e fortalecemento do BNG, principais peticións das dúas listas que confrontan con Pontón

"Normalidade" e "cordialidade". Así definen as dúas correntes críticas coa oficialidade do BNG a presentación de candidturas á Asemblea Nacional que a formación frontista celebra o vindeiro 1 de decembro. Unha situación que se produce, ademais, no momento de maior fortaleza política do Bloque como organización frontista.

Os candidatos destas dúas listas, Noa Presas, e o edil de Mos, Gustavo Barcia, destacan a necesidade de "mellorar" a organización interna do Bloque e, sobre todo, afondar en aspectos que teñen que ver coa "pluralidade interna".  Así, Noa Presas defendeu este sábado que a presentación da súa candidatura --'En Movemento'-- en que no Bloque "nunca hai contrarios", xa que o seu marco, apuntou, "é o do compañeirismo".

"Desde logo, para nós, é algo absolutamente natural e, da mesma maneira que o feminismo é plural e diverso e tece consensos desde as visións diferentes que temos cada unha, iso é o que facemos no BNG, o que facemos todos os días no noso traballo institucional no Parlamento, nas asembleas locais e comarcais e na asemblea nacional na que todos imos achegar as nosas visións para seguir traballando en ser o que somos e o que imos ser no futuro: a alternativa ao PP cada vez máis forte e sempre imparable", reivindicou.

LISTA 'EN MOVEMENTO'

Noa Presas, membro do colectivo interno Movemento Arredistas, encabeza a candidatura 'En Movemento'. Aínda que o regulamento permite que se poidan presentar candidaturas cun mínimo de 15 nomes, a parlamentaria autonómica presenta, do mesmo xeito que Pontón, unha lista completa, conformada por 50 persoas.

Entre elas, están o concelleiro coruñés David Soto no número dous, e  Xulio Conde, militante que concorreu no número 11 da lista do BNG pola Coruña ás autonómicas, no tres. Na candidatura aparecen nomes de sindicalistas da CIG como Anxo Noceda e Manuel Simón, así como portavoces e militantes de distintas localidades de todo o territorio galego.

"FORTALECER" O ESPAZO INTERNO DO BNG

Pola súa banda, Gustavo Barcia, destaca que concorrerá á XVIII Asemblea Nacional do BNG, cun espírito "claramente construtivo" e, en definitiva, para "mellorar" a formación nacionalista. Faino baixo a marca 'Alicerce' e en compaña de varios militantes da zona da Costa da Morte, Barbanza e o sur de Pontevedra, principalmente.  'Alicerce nace para poder fortalecer os principios e pór en común as ideas e participar dunha forma máis activa na propia organización", explicou Barcia este sábado na presentación da candidatura en Santiago.

Neste sentido, detallou que o seu colectivo ten tres eixos fundamentais: reforzar a participación da base militante en todos os sectores do BNG, a igualdade e a diversidade e o ecoloxismo. Desta forma, remarcou que "deben buscar novos mecanismos" que "melloren e intensifiquen" a toma de decisións colectivas e que "toda a militancia" senta implicada e participa nelas.

"A DIVERSIDADE DE OPINIÓNS ENRIQUECE AO BNG"

Así mesmo, Barcia defendeu que no BNG haxa diferentes candidaturas de cara á próxima asemblea nacional e é que a "diversidade de pareceres e opinións" é algo que "enriquece e potencia" a organización e "permite ampliar" a súa base social para chegar a máis sectores da sociedade.

"Alicerce nace coa vontade de construír dentro do BNG para que Galicia teña un presente e un futuro máis democrático, máis feminista, máis diverso e ecoloxista", esgrimiu. A preguntas dos medios de comunicación, puntualizou que esta corrente política dentro do BNG "non é unha cuestión de crítica", senón que buscan "profundar neses ámbitos" e que se "tomen medidas máis atrevidas" nalgunhas cuestións.