Comezan as baixas de cargos institucionais e militantes no novo BNG

Cargos institucionais e militantes do Bloque Nacionalista Galego comezaron xa a tramitar a súa baixa desta formación, ou sopensan seriamente facelo, entre eles, concelleiros e alcaldes, segundo informaron a GC fontes vinculadas á organización frontista. 

Público no acto de Abrente

Cargos e militantes vinculados a Abrente mantiveron varios contactos nos últimos días para analizar o futuro desta corrente. Nestes encontros algúns decidiron desvincularse definitivamente do Bloque e, outros, pola contra, seguirán afiliados a esta formación.

Estas baixas estarían provocadas logo dos resultados da última Asemblea Nacional do BNG na que triunfaron amplamente as teses da UPG. Xusto despois desa asemblea, quen fora portavoz dos nacionalistas na Cámara Galega, Carlos Aymerich, anunciaba xa a súa marcha. Posteriormente, fíxoo quen foi o vicepresidente da Xunta e portavoz nacional, Anxo Quintana, o que lle valeu un durísimo artigo de opinión en La Voz de Galicia.

A maior parte dos militantes que se están dando de baixa ou pensan facelo pertencen a corrente Abrente, que coordinaba o propio Aymerich. E entre eles, hai concelleiros e rexedores como o de Vimianzo, Manuel Antelo ou o de Castrelo de Miño, Xurxo Rodríguez, moi vinculado a Quintana. Os mesmos pasos podería seguir o alcalde de Ribadeo, Fernando Suárez. Todos eles xa teñen sopesado os pros e os contras da súa decisión.

E é que xusto despois da asemblea, a nova Executiva, con Ana Belén Pontón á cabeza, realizarou un contacto directo con todos os rexedores nacionalistas para tentar limar asperezas e insistir en que o Bloque segue sendo un "proxecto plural" e "con forza en institucións importante", entre elas, as deputacións provinciais.

Carlos Aymerich nunha intervención na Cámara galega | Fonte: BNG

De feito, outros alcaldes vinculados a Abrente, como o de Bueu, A Pobra do Brollón ou Zas continuarán no BNG, tentados, en parte, polas axudas que poden recibir das deputacións provinciais nas que o Bloque goberna en coalición co PSdeG. "É entendible esta postura xa que é o único xeito de facer proxectos importantes nos seus concellos", indican as fontes consultadas. Outros, como os de Rianxo e Tomiño, Adolfo Muíños e Sandra González, respectivamente, en orixe vinculados tamén a Abrente, xa forman parte da nova dirección do BNG, que controla a UPG.

Hai uns días, o rexedor de Vimianzo non descartaba a GC a súa saída do Bloque. "Eu non me movín do BNG, quen se está movendo é o BNG", suliñaba e destacaba que Aymerich "non está só" na súa decisión porque con el "hai moita xente". Novamente contactado por GC, Antelo evitou falar sobre o seu futuro e insistiu que, sobre esta cuestión, "a súa posición é moi clara e moi coñecida".

Anxo Quintana na presentación de Somos Nós