Galicia pide por carta ao Goberno manter os criterios de repartición de cotas de bocarte da resolución de 2024
A Xunta aposta por conceder quilos por buque e día diferenciando as embarcacións de máis de 120 GT (arqueo bruto) ou de menos, pero que conten con 12 ou máis tripulantes enrolados, así como dados de alta na Seguridade Social do resto da frota.
Por Europa Press / Redacción | SANTIAGO DE COMPOSTELA | 27/02/2025 | Actualizada ás 15:30
A Consellería do Mar remitiu unha nova carta á Secretaría Xeral de Pesca, dependente do Ministerio de Agricultura, Pesca e Alimentación para pedir que manteña os criterios de repartición das cotas de bocarte da resolución de marzo de 2024 para establecer as medidas de ordenación pesqueira desa especie. A Xunta, segundo informou nun comunicado, aposta por conceder quilos por buque e día diferenciando as embarcacións de máis de 120 GT (arqueo bruto) ou de menos, pero que conten con 12 ou máis tripulantes enrolados, así como dados de alta na Seguridade Social do resto da frota.
A Consellería do Mar enviou unha nova carta (o pasado 13 de febreiro foi remitida outra sobre o mesmo asunto "sen recibir resposta") ao órgano estatal que ten previsto publicar proximamente unha nova resolución. Na misiva, tamén pediu que a frota do cerco poida consumir o 80 % da cota dispoñible de bocarte da zona oito do CIEM (ANE/08) no primeiro semestre do ano. Con isto, explicou a Xunta, o 20 % restante sería utilizado ao longo do segundo semestre do 2025. O Executivo galego recolleu as demandas do propio sector, que tamén pide que se manteñan os criterios de topes máximos de captura e desembarques para os buques do cerco do Cantábrico e Noroeste entre marzo e xuño que houbo en 2024.
A XUNTA CRITICA "FALTA DE TRANSPARENCIA"
O departamento que dirixe Alfonso Villares critica que, nesta ocasión, a frota galega "non tivo oportunidade" de participar e achegar propostas ao "non ser consultada" de cara á próxima publicación das medidas de ordenación desta especie. Neste contexto, o Goberno autonómico cuestionou a "falta de transparencia" do Ministerio ao adoptar medidas que "alteran significativamente" a proposta que formulou hai uns días a Consellería, e que, tras requirir á Secretaría Xeral de Pesca información oficial de calquera cambio, "segue sen recibir" a información necesaria para trasladala ao sector.
