A CRTVG non cede e recorrerá a sentenza que a condena a rectificar unha información sobre o BNG
O ente público confirma que presentará un recurso de apelación ante a Audiencia Provincial da Coruña ao entender que a sentenza do xulgado de primeira instancia número 5 de Santiago de Compostela "excede os límites do dereito de rectificación"
- TVG condenada a rectificar no Telexornal unha noticia errónea sobre a ausencia do BNG nun acto de Castelao
- O BNG leva aos xulgados á TVG por non rectificar unha información falsa sobre a súa presenza nun acto de Castelao
Por Europa Press / Redacción | SANTIAGO DE COMPOSTELA | 27/02/2025 | Actualizada ás 18:13
A Corporación Radio Televisión de Galicia (CRTVG) recorrerá a sentenza xudicial que a condena a emitir no Telexornal Mediodía unha rectificación por incluír neste espazo informativo unha peza na que afirmaba que o BNG non enviara representación a un acto da Xunta e a Fundación Castelao ao que si acudiran varios representantes da formación frontista.
Nunha resposta facilitada polo seu departamento de prensa a Europa Press, o ente público confirma que presentará un recurso de apelación ante a Audiencia Provincial da Coruña ao entender que a sentenza do xulgado de primeira instancia número 5 de Santiago de Compostela "excede os límites do dereito de rectificación".
O fallo condena ao director da Corporación Radio Televisión de Galicia, Alfonso Sánchez Izquierdo, a rectificar no Telexornal unha noticia errónea emitida o pasado mes de xaneiro. Dá a razón ao Bloque en reclamar que a información sexa rectificada dentro dos espazos informativos, xa que ve insuficiente a mensaxe publicada en redes sociais da TVG na que recoñecían o erro.
Despois de transcender a resolución xudicial, a CRTVG trasladou que foi "a primeira en admitir o erro o día da súa emisión", un fallo que cren "evidente" ao ser emitidas na cobertura do acto imaxes nas que podían verse aos membros do BNG presentes no acto, o que, como subliña, pon de manifesto a "falta de intencionalidade".
Engade que a corporación "rectificou de forma inmediata" na conta en redes sociais de 'G24Noticias' "onde lle foi solicitado, ao ser o medio máis rápido e de maior difusión antes de chegar ao seguinte informativo da tarde en televisión, onde se emitiu a información correcta".
"A CRTVG demostrou responsabilidade, dilixencia e boa fe á hora de recoñecer o erro, e recorrerá a sentenza xa que se entende que o fallo excede os límites do dereito de rectificación", engade o equipo de prensa do ente público.
SENTENZA
A sentenza, asinada o martes 25 de febreiro e que foi difundida este xoves, dá a razón ao Bloque na súa demanda contra o ente público ao reconcer que ten dereito a que a información sexa rectificadad dentro dos seus espazos informativos, pois ve insuficiente a mensaxe publicada en redes sociais da TVG na que recoñecían o erro.
"Non pode atribuírse relevancia semellante a un comunicado efectuado a través das redes sociais xa que nin ten o mesmo formato nin a difusión que poida alcanzar un espazo audiovisual e tampouco poden compararse os destinatarios da información", subliña a sala.
O fallo obriga á CRTVG a emitir a rectificación no Telexornal Mediodía (mesmo espazo onde foi emitida a noticia), no que deberán dar lectura a unha carta enviada polo BNG na que trasladaban a súa queixa polo ocorrido. Terán que facelo nun prazo de tres días unha vez sexa asine a condena, que non o é aínda ao caber recurso de apelación contra a sentenza.
Tras coñecerse a sentenza, a viceportavoz parlamentaria do BNG Olalla Rodil expresou que a resolución "fai prevalecer a verdade e os dereitos da sociedade galega a contar con medios de comunicación públicos plurais, veraces e obxectivos". "Hoxe damos un paso máis na defensa e no rescate dos medios públicos de Galicia", engadiu a deputada no Parlamento galego.
NOTICIA ERRÓNEA
O luns 24 de febreiro os xulgados da capital galega acolleron a vista pola demanda interposta polo BNG contra a CRTVG pola emisión nos seus informativos televisivos de mediodía do 10 de xaneiro na que afirmaban que a formación nacionalista se ausentou ao acto organizado o pasado martes pola Fundación Castelao con motivo do 75 aniversario do falecemento do político e intelectual rianxeiro.
A peza, incrustada entre o parte meteorolóxico e a información deportivo, iníciase cunha locución do presentador na que asegura que o BNG "non estivo" no acto do pasado luns no Panteón dos Galegos Ilustres, ao que asistiron, entre outros cargos da organización nacionalista, a súa viceportavoz parlamentaria, Olalla Rodil, e a alcaldesa de Santiago, Goretti Sanmartín.
A entradilla do presentador do informativo da televisión pública galega dá paso a unhas declaracións do conselleiro de Cultura, José López Campos, nas que critica ao Bloque por organizar "un acto paralelo" en Pontevedra en honra ao intelectual morto no exilio en 1950.
A emisión deste contido provocou a reacción da formación nacionalista, que remitiu unha carta ao director xeral da corporación, Alfonso Sánchez Izquierdo, na que demandaba unha rectificación "inmediata" por tratarse dun "bulo" e unha "groseira manipulación" da que ven "cómplice" ao conselleiro de Cultura.
Uns 20 minutos despois do traslado aos medios de comunicación do envío desta queixa oficial por parte do BNG, a conta da CRTVG na rede social 'X' publicou unha mensaxe no que rectifica o contido da peza emitida horas antes no Telexornal.
"A CRTVG fíxose eco hoxe da controversia pola existencia de dous actos polo 75º aniversario do falecemento de Castelao, celebrados o mesmo día. Na introdución desta noticia no noso Telexornal Mediodía díxose que non asistisen representantes do BNG a un deses actos, o da Fundación Castelao", sinala en primeiro lugar a mensaxe da conta do ente público.
A continuación, recoñece que ese "dato" é "evidentemente un erro", dado que "na propia información" emitida o día 7 de xaneiro da cobertura do acto celebrado en Santiago a TVG "ofreceu varios planos" de Olalla Rodil e de Goretti Sanmartín durante a súa celebración.
RECTIFICACIÓN INSUFICIENTE
Pero a rectificación en redes sociais da CRTVG non é suficiente nin tampouco existen "probas" que acrediten, como alegou a súa representación legal, que se emitiu no noticiario nocturno unha desculpa, como incide o tribunal santiagués, que entende que esta debe ser emitida no mesmo soporte e espazo onde se difundiu o erro para alcanzar, así, a mesma audiencia.
Ademais de recoñecer que si había presenza do BNG no acto e que difundiron unha información falsa, os espazos informativos do ente público terán que dar lectura a parte da carta remitida pola organización política tras a emisión do Telexornal do 10 de xaneiro na que manifestaban o seu malestar e esixían unha rectificación.
O tribunal exclúe unha fracción desa misiva ao considerar que inclúe "reflexións críticas que non conteñen un substrato fáctico necesario para acreditar o erróneo da información ofrecida". "Por moi lexítima que resulte a crítica efectuada non procede a súa incorporación á rectificación", conclúe a sentenza.
