O CCG expón un modelo voluntario na escola con máis materias en galego
"Abrimos un debate para propiciar consensos no marco do noso labor asesor e consultivo e pedimos que todo o país estea unido en favor da súa lingua", sinalou a presidenta do Consello da Cultura Galega
Por Europa Press / Redacción | SANTIAGO DE COMPOSTELA | 27/02/2025 | Actualizada ás 20:10
A creación dun modelo optativo para os centros educativos nos que exista a posibilidade de acollerse a impartir máis materias e actividades en galegos é unha das propostas analizadas nunhas xornadas organizadas polo Consello da Cultura Galega.
Este xoves, esta e outras propostas foron abordadas no marco da xornada 'Educación e socialización', abertas pola presidenta do Consello da Cultura Galega, Rosario Álvarez, e que continuarán o 20 de marzo cunha nova mesa, nesta ocasión, centrada na administración.
"Abrimos un debate para propiciar consensos no marco do noso labor asesor e consultivo e pedimos que todo o país estea unido en favor da súa lingua", sinalou a presidenta do CCG durante a súa intervención, segundo recolle un comunicado.
Neste foro analizouse a propuseta dun modelo educativo "piloto e voluntario" co galego como lingua vehicular que, de forma vountaria e consensuada entre todos os axentes implicados, poida compensar "a menor presencial social do galego".
"Os expertos sinalan que experiencias previas noutros lugares e as escasas aplicadas en Galicia, dan resultados moi positivos, tanto desde o punto de vista lingüístico, como no rendemento académico", explicou Ana Iglesias, experta e docente en conciencia lingüística e didáctica da lingua.
A proposición expón un modelo no que os centros educativos e as familias teñen máis autonomía á hora de elixir como se educan os nenos.
Desta forma, aos res ou catro anos do seu impantación avaliaríanse os primeiros resultados de adquisición de competencia e posibilidade de usos lingüísticos, para realizar "unha valoración obxectiva de vantaxes, desvantaxes, fortalezas, debilidades".
O CCG explicou que esta proposta permite "canalizar a demanda de familias que desexan un modelo que mellore as competencias lingüísticas bilingües ou un maior peso do galego no ámbito educativo".
