Morre un dos referentes dos monicreques galegos

Alfonso Silvent, fillo de José Silvent "Barriga Verde", e unha das últimas persoas que manipulou os monicreques desta obra tradicional, faleceu a pasada noite.

Alfonso foi un feirante de raza, como amosa o feito de ter nacido nas festas de Bouzas, onde actuaba a súa familia, en 1931. Ao longo da súa vida, para alén de traballar no espectáculo familiar, levou tiros, tómbolas e practicou a venda ambulante entre outras ocupacións.

A Asociación Cultural Morreu o Demo lembra a súa importancia decisiva na recuperación da memoria desta peza de títeres populares.

“Malia a que a súa saúde levaba anos xa mermada, Alfonso amosaba o seu carácter de home de espectáculo. Sempre imos lembrar o xeito no que semellaba coller vida cada vez que saía falar dos seus tempos de feirante. Como de socato semellaba capaz de aturar horas en eventos e encontros. O xeito no que se erguía, como se lle aclaraba a voz e estaba sempre disposto a botar man da palleta e facer unha demostración onde fixese falla. A inauguración do Museo da Marioneta de Lalín, o Café da Memoria, as presentacións de libros, catálogos e DVDs, a exposición De feira en feira… a todo se apuntaba e a todas partes levaba a súa memoria, o seu humor e a súa forza”, escriben na Barriga Verde.

A súa xenerosidade e colaboración constante facilitou que un material que era memoria familiar se poida incorporar ao patrimonio inmaterial común.

O enterramento será este xoves, 16 de xuño, no cemiterio parroquial de Lérez, onde residía coa súa familia.