Un estudo galego demostra que hai nenos xeneticamente resistentes á meninxite máis temida
A investigación sobre a enfermidade meningocócica foi coordinada polo xefe do Servizo de Pediatría do Hospital Clínico, Federico Martinón, e Antonio Salas Ellacuriaga, profesor da Facultade de Medicina da Universidade de Santiago de Compostela
Por E.P. | SANTIAGO DE COMPOSTELA | 04/11/2016 | Actualizada ás 11:05
Un estudo dirixido dende Santiago de Compostela demostra que hai nenos xeneticamente resistentes á enfermidade meningocócica, a meninxite máis temida, segundo informa o Instituto de Investigación Sanitaria (IDIS). Así, investigadores do grupo Genvip, do Instituto de Investigación Sanitaria de Santiago, comprobaron que o xen CFH "xoga un papel central nos mecanismos invasivos relacionados coa enfermidade meningocócica", informa o IDIS.
O estudo publicouse na revista do grupo Nature, Scientific Reports e foi coordinado dende Santiago polo xefe do Servizo de Pediatría do Hospital Clínico, Federico Martinón, e Antonio Salas Ellacuriaga, profesor da Facultade de Medicina da Universidade de Santiago de Compostela (USC). Ademais, contou coa participación de máis de 20 hospitais españois con financiamento tanto por parte do Instituto Carlos III —programa FIS— como da Unión Europea —7º programa marco—.
Este proxecto, segundo explica o IDIS, aborda o estudio dos factores xenéticos que subxacen á enfermidade meningocócica, "a principal causa de morte por meninxite e sepse bacteriana fatal no mundo occidental a pesar dun diagnóstico e tratamento correcto".
"A súa distribución é universal e a súa epidemioloxía é dinámica e impredicible, sucedendo en persoas polo demais sas. A infección é frecuentemente desvastadora, implicando graves secuelas ou ata a morte do doente", sinala o IDIS.
O estudo mostra como "ata un 14 por cento dos nenos levan en ese xen unha variante protectora que fai que sexa un 60 por cento menos probable que teñan este enfermidade que o resto", segundo apuntou o doutor Martinón.
EVIDENCIA ESTATÍSTICA
Martinón sinalou que "achega pois a evidencia estatística máis convincente sobre o papel" da variación xenética nos humanos na susceptibilidade á enfermidade meningocócica.
A variación xenética do hóspede, segundo concretaron, "pode decantar a infección do meningococo cara a unha situación de portador asintomático ou cara a unha situación de enfermidade invasiva mortal".
No marco da investigación, ademais da rede nacional Esigem, os investigadores estableceron unha colaboración internacional con grupos de Inglaterra, en concreto co Imperial College Londos e o Centro de Enfermidades Infecciosas do Instituto de Genómica de Singapur (GIS).
O traballo, segundo engaden, "é unha continuación dun estudo previo" realizado polo mesmo grupo e publicado en 'Nature Genetics', onde xa se apuntaba "a esta rexión xenómica como presuntamente asociada coa enfermidade meningocócica".
Os especialistas recordan que a enfermidade afecta a nenos e, sobre todo, a lactantes, aínda que "non existe unha idade de risco cero". Ao respecto, indican que o meningococo está presente na farinxe de moitas persoas que non presentan os síntomas da enfermidade.
