Temas: LUMES INCENDIOS NUNCA MáIS MANIFESTACIóN

Milleiros de persoas reviven o NUNCA MÁIS aos lumes

Dignidade, valentía, afouteza, carraxe e, sobre todo, corazón e solidariedade. Os galegos saben loitar cando teñen que loitar e berran cando están indefensos, como canda o Prestige. E aquel berro que se escoitou en todo o mundo hai 15 anos volveu ser o motor de milleiros de persoas que este martes se botaron a rúa para entoar o LUMES NUNCA MÁIS

Fotogalería da manifestación en Vigo contra os lumes que arrasaron Galicia en pleno outubro e a xestión da Xunta

Por Galicia Confidencial | Vigo | 16/10/2017 | Actualizada ás 22:47

“Do teu verdor cinguido / e de benignos astros,/ confín dos verdes castros / e valeroso chan,/ non des a esquecemento / da inxuria o rudo encono;/ esperta do teu sono / Fogar de Breogán...”. Eses versos de Pondal que Pascual Veiga fixo música hai 127 anos seguen vivos na memoria colectiva dos galegos.

E o certo é que foron milleiros de persoas as que este luns saíron nos municipios galegos e cidades como Madrid e Barcelona contra a xestión da Xunta durante a vaga de incendiose para clamar: 'Lume, nunca máis'. Milleiros de voces que pediron que Galicia manteña o seu "verdor cinguido" e os seus "verdes castros" pero con novas políticas forestais.

As sete cidades galegas, así como diversos municipios como Nigrán, Monforte, Carballo e Verín contaron con actos de repulsa contra os incendios que arrasan Galicia, con berros nos que se esixiu a "dimisión" do presidente da Xunta, Alberto Núñez Feijóo.

En Vigo (fotogalería da manifestación), máis de 5.000 persoas –algunhas fontes falan de ata 10.000-- concentráronse en defensa dos montes galegos --fronte ao Museo Marco en Cálea Príncipe-- e para mostrar o seu rexeitamento á política forestal da Xunta e "os recortes" do Goberno de Núñez Feijóo en materia de prevención de incendios. Entre outros, asistiron a portavoz nacional do BNG, Ana Pontón; a deputada de En Marea no Congreso Alexandra Fernández e o secretario xeral de CC.OO., Ramón Sarmiento.

Os participantes, ademais das peticións de dimisión de Feijóo e da conselleira de Medio Rural, Ángeles Vázquez, cargaron contra a "eucaliptización" de Galicia. Tamén se escoitaron emas de apoio ao pobo de Portugal afectado nestes días por unha vaga de incendios do mesmo xeito que Galicia.

Santiago

En Santiago, centos de persoas concentráronse na Praza do Toural a partir das 20,00 horas --convocados por 'Lume, nunca máis'--- contra a xestión realizada e a falta da política de prevención da Xunta, nunha marcha que encheu logo a Praza da Quintana. Participantes falan de 10.000 persoas. A marcha estivo apoiada por diversos representantes políticos como o líder do PSdeG, Gonzalo Caballero; o portavoz parlamentario de En Marea; Luís Villares; o alcalde de Santiago, Martiño Noriega; e o portavoz municipal do BNG, Rubén Cela, entre outros.

Os manifestantes saíron en marcha polas rúas de Compostela tras unha pancarta na que se lía 'Lume, nunca máis'. Durante a protesta escoitáronse consignas como "A prevención é a solución", "Con este goberno estamos no inferno" e "Detrás do incendiarios hai un empresario".

Ourense

En Ourense, máis de 4.000 persoa berraron contra a "incompentencia" e "Feijóo, dimisión" nun percorrido entre a Subdelegación da Xunta e o edificio da Consellería de Medio Rural. Asubíos e carteis nos que se podía ler "Abandonados entre as chamas, non máis lumes" protagonizaron a xornada. O actor Fernando Dacosta leu o manifesto final.

En Nigrán

En Nigrán, varios centos de persoas acudiron ao paseo da Ramallosa para participar na concentración que culminou coa lectura dun manifesto por parte dun portavoz da Organización Galega de Comunidades de Montes. A lectura finalizou cun aplauso e ao berro de 'Lume, nunca máis, Feijóo dimisión'. Entre os asistentes estaban a presidenta da Deputación de Pontevedra, Carmela Silva; o deputado do BNG Luís Bará; o alcalde de Nigrán, Juan González, e concelleiros e veciños de Val Miñor.

O alcalde de Nigrán, Juan González, trasladou a Europa Press que a xente pasou "moito medo" e "está moi indignada" coa situación dada estes días na provincia de Pontevedra. Dixo que en Nigrán "non se recibiu "ningunha axuda externa" a pesar de que pediron medios humanos e aéreos. Acto seguido, puxo en valor a actuación dos medios propios e aos veciños que "loitaron contra o lume coma se fosen brigadistas".

A presidenta da Deputación, Carmela, Silva, coincidiu en que "é necesario reflexionar conxuntamente", pois aínda que admitiu que este fin de semana deuse "a treboada perfecta", hai que coidar dos montes. Así, avogou por implantar "un modelo de planificación e previsión". Tras iso, trasladou o seu "agarimo" aos achegados dos veciños de Nigrán falecidos.

As convocatorias comezaron ás 20.00 horas e tiveron lugar, ademais de nestas cidades e vilas, en Lugo: Edificio Multiusos da Xunta, Pontevedra: Praza da Peregrina, Ferrol: Praza de Amada García, Cangas: Praza do Concello, Monforte: Praza de España, Ribeira: Praza do Concello, Cambados: Praza do Concello, Lalín: Praza de Lóriga, As Pontes: diante do Concello, O Carballiño: Praza Maior, Ribadavia: Praza Maior, Rianxo: Praza de Padrón, - Betanzos: Praza do Concello, Verín: Praza do Concello, Xinzo: diante do Concello, A Guarda: Praza do Relón, Castro Caldelas: Praza do Prado, Redondela: Praza do Concello, Foz: Praza do Concello, Sada: Praza de San Roque, Vilagarcía: Diante do Concello, Viveiro: Praza Maior, Ponteareas: Praza do Concello ou o Barco, diante do Concello.

Contra o abandono do rural

No manifesto elaborado para as concentracións deste luns, as organizacións convocantes trasladaron que lamentan profundamente "as situacións caóticas que causaron a morte de persoas que se viron atrapadas polos lumes descontrolados", e achacaron o ocorrido a "as políticas de abandono do rural do PP".

Así mesmo, culparon a "a ausencia de políticas de promoción da multifuncionalidad e dos valores ambientais e patrimoniais do monte", así como "á política forestal exclusivamente productivista". Ademais, rexeitaron a versión da Xunta, "responsabilizando desta catástrofe ás autoridades de Portugal", e remarcaron que "o máis grave é pretender eludir responsabilidades atribuíndo os lumes ao terrorismo incendiario". "Terrorista é quen permite unha ordenación do territorio e unha política forestal que favorece que o noso país arde", sosteñen.

Finalmente, criticaron a falta de previsión, organización e medios, á vez que subliñaron que "é indignante" a "ausencia" informativa dos medios de comunicación públicos galegos, "sen dar sequera información das alertas".

Noticias relacionadas

Fotogalería da manifestación en Vigo contra os lumes que arrasaron Galicia en pleno outubro e a xestión da Xunta

Temas: LUMES INCENDIOS NUNCA MáIS MANIFESTACIóN

9 Caste Caste

Coma é habitual, algúns a impoñer pancartas, portadores das mesmas, contido dos manifestos, lectores/as dos discursos e consignas a berrar. O que acontece é que xa son moitos os que saben os seus trucos e mesmo lles berran cando aparecen nas manis coas súas bandeiras partidarias. É que estes do BNG e da CIG, é dicir, a UPG non aprenden nin cos seus desastres electorais. Pensan que coa súa lexión de liberados a soldo en deputacións, concellos e sindicatos lles chega. E non.

8 Galego

A cigosada e o BNG como aves carroñeiras pescando votos. Non se porque me dá que desta non coa. Lembremos a catastrófica xestión da onda de incendios de 2006, cando o infausto Suarez Canal era conselleiro de Agricultura do BNG no sinistro bipartito nacional-socialista

1 Galicia_mindundista

Que eu lembre no goberno de Suárez Canal fíxose o BANTEGAL promoveuse o coidado do rural, a vixiancia do monte polos veciños, o aproveitamento dos refugallos etc. ¿Que é o que fixeron, propuxeron, comentaron os vosos? NADA , vos perdiades o tempo esbardallando en contra do galego e o que padeciades coa "imposición do galego en Galicia". Inda hai pouco que soubemos do plan dos vosos para Galicia: trocala en paisaxe para películas...A catástrofe sodes vos, porque sodes da mesma ralea que fixo o FRACASO secular do estado. Non hai ideas pola vosa banda, o que hai é imposición e mantemento do sistema íntegro (o bo e o malo). Imos ver se tedes algunha idea (coa túa axuda, claro). Veña, sindicado fascista....

7 Berenjenas Rebolo

Bandeiras do BNG, Galiza Nova e da CIG. Nada que ver co Nunca Mais do Prestige.

1 Amosanda

Quem che proibiu ir?

6 Antilumes

Ese novo Nunca Máis tén que se organizar rapidamente e non seguir deixando o pobo indefenso á intemperie e a mercede do lume dos incendiarios. Deixarse de protagonismos e facer a unidade na práctica.

5 Arturo

Moi ben ,pero todas as manifas que se queiran non can rematar cos incendios. mentras siga habendo pirómanos, mentres a xente non os denuncie, vai seguir habendo incendios. Non é una cuestión de " abandono do monte", que se unha reforma forestal, que se outro modelo, en definitiva, solución políticas. Non. Xa pode haber todo eso e mais, que se sigue habendo pirómanos organizados, vai seguir habendo incendios. A xente non o quere admitir, e repite a trécola infinita de se abandono do rural, que se outrreo modelo, etc. Todo eso non é a causa eficiente dos incendios, son os pirómanos galegos organizados. ¿ E tan difícil de entender ? ¿ Ou será que a verdade doe e non se quere admitir ?

1 Antilumes

"A xente non o quere admitir e repite a trécola infinita do abandono do rural"É que a xente é moi maniática. Mira ti que se lle foi ocurrir! A razón téñena Feixón e Rachou que ben aprenderon do seu pai Franco ("La culpa la tiene el contubernio judío-masónico y el comunismo internacional") e lle botan a culpa á climatoloxía e a Portugal. Que lles apliquen xa o 155! Aos incendiarios non, que aínda teñen moito labor por facer. E ademais (fiscal dixit) non consta trama ningunha, non existen. Non vos riades que o conto é triste.

2 Failde

É que o Arturo, especialista en tapar o rabo do Partido Podre coa trécola dos pirómanos mafiosos, sabe moito máis que o fiscal especializado no asunto... Debe ser, polo menos, compadre da conselleira impostada de Medio Rural, e afillado da que aspira a ser alcaldesa da Coruña esquecendo as funcións polas que cobra e sae nas fotos. Triste miseria, servo Arturo!