Premio 'Celanova, Casa dos Poetas' para o Parlamento de Galicia

A relación de colaboración co Parlamento de Galicia que a Fundación sinala que se remonta á presidencia de Victorino Núñez, cando a Casa dos Poetas era "só un ilusionante proxecto de futuro, que continuou dunha maneira especial con Dolores Villarino e Pilar Rojo e que se consolidou nos últimos anos con Miguel Santalices á súa fronte".

Como mostra, a Fundación destaca a celebración da xornada de achegamento do Parlamento co das Illas Azores, celebrada na Casa dos Poetas o 15 de setembro do pasado ano como consecuencia da relación do escritor dos Azores, Antero de Quental co propio Manuel Curros Enríquez.

Con este recoñecemento, a Fundación Curros Enríquez destaca o esforzo que "o Parlamento está a facer por abrirse ao país, tratando de ter presenza activa, máis aló da vida parlamentaria que se desenvolve diariamente no Pazo do Hórreo, en todos os ámbitos sociais, culturais, educativos, etc., co fin de que poida ser sentida como a institución máis representativa da sociedade galega".

"Tendo presente que Curros Enríquez exerceu durante un tempo da súa vida como activo e crítico cronista parlamentario en Madrid, nestes tempos de tanto vertixe social e político, a Fundación que leva o seu nome desexa reivindicar o parlamentarismo como a mellor das fórmulas posibles de organización social, e o debate e o diálogo como as únicas receitas para a consecución de acordos destinados á mellora da nosa convivencia", indicou a formación. Por estes motivos, a Fundación convida a todas as forzas políticas representadas no arco parlamentario "a que estean representadas o próximo día 2 de setembro no acto de entrega que, como todos os anos, terá lugar na Casa dos Poetas de Celanova".

Na reunión do Padroado da Fundación Curros Enríquez estiveron presentes representantes do Concello de Celanova, do Consello da Cultura Galega, da Deputación Provincial de Ourense, das Universidades de Vigo e A Coruña e outros patróns a título individual, co fin de aprobar as contas e actividades de 2017, planificar as actuacións para 2018 e acordar o orzamento anual que achegan en distintas proporcións algúns dos patróns institucionais como o Concello de Celanova, a Deputación Provincial e a Consellería de Cultura.

Con esta reunión tamén se renovou o compromiso de colaboración na organización de actividades conxuntas a nivel expositivo ou de promoción dos autores de Celanova por parte daqueles patróns que non achegan cantidades concretas ao orzamento común da Fundación como o Consello da Cultura Galega, a Real Academia Galega e Universidades da Coruña, Santiago de Compostela e Vigo.

Como valoración do ano 2017, destacouse a cifra de máis de 11.000 persoas atendidas pola Fundación Curros Enríquez e a fidelización dos centros que escollen Celanova para as súas excursións, con máis de 2.700 escolares atendidos de 65 centros este ano. A Casa dos Poetas tamén acolleu o pasado ano numerosas exposicións, presentacións de libros, concertos, visitas teatralizadas, conferencias e proxeccións.