O PP galego sae perdendo na pugna entre Saénz de Santamaría e Cospedal
Os populares galegos apoiaron maioritariamente a exsecretaria xeral do PP que quedou fora da segunda volta, detrás de Saénz de Santamaría e Pablo Casado. Volve saír reforzado o PP de Baltar, que foi o único que apoiou á gañadora.
Por Galicia Confidencial | Madrid | 05/07/2018 | Actualizada ás 23:47
A exvicepresidenta do Goberno Soraya Sáenz de Santamaría resultou vencedora da primeira volta do proceso interno para elixir ao líder do PP e pasa á segunda rolda xunto a Pablo Casado, ao que superou nuns 1.600 votos.
A gran sorpresa foi a derrota da ex secretaria xeral do PP, María Dolores de Cospedal, que quedou en terceira posición e que deixa en mal lugar a Núñez Feijóo e ao PP galego que a apoiou maioritariamente. Con todo, reforza a José Manuel Baltar, xa que o PP ourensán decantouse pola ex vicepresidenta.
Os resultados provisionais da votación foron os seguintes co 87% de participación: Soraya Sáez de Santamaría, 21.513 votos; Pablo Casado, 18.967; Mª Dores de Cospedal, 15.090.
Os primeiros recontos de votos das primarias nas sedes do Partido Popular, con datos aínda non oficiais, deron un resultado moi axustado entre o vicesecretario de Comunicación do partido, Pablo Casado, e a exvicepresidenta do Goberno, Soraya Sáenz de Santamaría, mentres que a exsecretaria xeral, María Dores de Cospedal, quedaba fóra da carreira ao quedar en terceira posición. Tamén caen da carreira, e moi descolgados do tres principais precandidatos, quedan Jose Manuel García-Margallo (en cuarto lugar), Jose Ramón García Hernández e Elio Cabanes.
Casado obtería os mellores resultados en Madrid, Murcia, as Illas Baleares e as provincias de Castelló, Ávila e León. segundo fontes da súa candidatura. Soraya Sáenz de Santamaría lidera o reconto en Andalucía, A Rioxa e Castela e León (principalmente na súa cidade, Valladolid); e nas provincias de Valencia e Alacante.
