Estabilizados os dous incendios do parque natural de O Invernadoiro

Os dous incendios que se iniciaron na tarde do mércores no parque natural de O Invernadoiro, en Vilariño de Conso, atópanse "estabilizados", tras afectar xa a 110 hectáreas, segundo a información facilitada pola Consellería do Medio Rural.

Ambos lumes comezaron ás 16,10 horas do mércores, na parroquia de San Mamede de Hedrada, separados por apenas 500 metros e, segundo as últimas estimacións, afectan a 14 e a 96 hectáreas, nun lugar de difícil acceso para medios terrestres.

Nas tarefas de extinción traballaron desde o mércores 4 técnicos, 37 axentes, 83 brigadas, 37 motobombas, 5 pas, 14 helicópteros e 7 avións. A Consellería do Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal.