O PP podería vetar comparecentes na Comisión de investiagación sobre a sanidade

O portavoz parlamentario do PPdeG, Pedro Puy, acusou aos grupos da oposición de propor comparecencias "incoherentes" para a comisión de investigación sobre a sanidade pública, ao facer fincapé en que o obxectivo, nas súas palabras, é avaliar a incidencia do gasto público na asistencia prestada durante o período da crise.

Así, Puy mostrouse en contra da terminoloxía empregada pola oposición, que circunscribe a investigación á "incidencia dos recortes" nas prestacións sanitarias, pero chamou a atención sobre que, a pesar de todo, os populares aceptárona.

A vontade do grupo maioritario, segundo dixo en rolda de prensa este luns, é incorporar algunhas das propostas da oposición, co ánimo de chegar a acordos, aínda que xa avanzou que será "complicado" en relación aos comparecentes, cando "cada un" presentou un plan e "só se parecen --ao seu xuízo-- en que ningún ten interese en ver a real evolución do gasto sanitario".

Coincidindo coa reunión, este luns, da mesa desta comisión e da que investigará o accidente do festival O Marisquiño en Vigo, Pedro Puy explicou que, como adoita ser habitual, o plan de traballo "inicial" que se traslade será o do grupo maioritario, sen prexuízo de posteriores incorporacións.

No caso da comisión sobre a sanidade pública, chamou a atención sobre a necesidade de "racionalizar" e achegar "sentido común", posto que as peticións roldan as 250, cunhas 70 de En Marea, case 60 do PSdeG, 80 de BNG e unhas 25 do PP. Pola súa banda, comentou que chamarán ao conselleiro de Facenda e ao Consello de Contas, e mostrou a súa sorpresa por que ningún dos grupos da oposición solicitasen a súa presenza.

Tamén chamou a atención sobre que "non inclúen expertos en gasto sanitario" e advertiu de que se houbo incremento do consumo de fármacos xenéricos e iso supuxo aforro, desde o seu punto de vista, non pode ser considerado unha diminución na prestación.

HEPATITE C E PAC A ESTRADA

Sobre o tratamento da hepatite C, os populares, segundo indicou o seu portavoz parlamentario, propoñen chamar a asociacións e tamén ao asesor xurídico do Sergas que está a intervir na "cuestión xudicializada".

Para pronunciarse sobre a morte dun paciente no punto de atención continuada (PAC) da Estrada, ao director de procesos sen ingresos da EOXI (estrutura de xestión integrada) de Santiago e ao representante do 061 que "participaron neste suceso".

Cuestionado sobre se estima que se darán interferencias cos procedementos xudiciais, comentou que non ten coñecemento de ningún caso polo ocorrido na Estrada (si dunha denuncia ante a Garda Civil).

ACCIDENTE O MARISQUIÑO

En canto a O Marisquiño, resaltou que "se aplicará regulamento". Isto é, "se algunha das persoas" chamadas vese afectada o ámbito xudicial, "poderá actuar conforme ao seu interese de defensa" e, neste sentido, admitiu Puy que "condiciona" o traballo da comisión parlamentaria.

Aínda no relativo a esta segunda comisión de investigación, sinalou que o PSOE declinou a presentación dunha proposta de plan de traballo e que no resto dos grupos existe "máis grao de coincidencia" que na da sanidade pública. Así, a maiores das comparecencias propostas polo PP, dixo que os populares verán "cales complementan" das expostas polo resto de grupos.

Ademais do delegado territorial da Xunta e o xerente da EOXI de Vigo, o grupo maioritario propuxo a un portavoz dos afectados no sinistro, expertos, representantes da organización e da administración local (incluídos o alcalde de Vigo e concelleiros). E o presidente do Porto de Vigo, pola súa banda, pediu persoalmente comparecer.