Traballando pola inclusión social desde Fene
Viaqua traballará co centro especial de emprego Amilaxa para a contratación de diversos servizos.
Por Galicia Confidencial | Fene | 01/01/2019 | Actualizada ás 19:00
Viaqua e o Centro Especial de Emprego de persoas con discapacidade, AMILAXA SERVIZOS XERAIS, asinaron un convenio de colaboración empresarial, para o desenvolvemento de diferentes actividades en Galicia. Amilaxa atópase situada en Fene, onde a concesionaria Viaqua leva xestionando o ciclo integral da auga desde o ano 1993.
“Amilaxa ten o obxectivo de ser o aliado perfecto de empresas institucións e autónomos considerándose como uno máis dos seus provedores de servizos xerais socialmente responsables”, apunta a entidade nun comunicado. O capital humano desta empresa está formado por mulleres e homes con discapacidade física, intelectual, sensorial e trastorno mental.
Viaqua conta co selo da Fundación Bequal que certifica e identifica o compromiso e esforzo da compañía coa integración laboral de persoas con discapacidade. Por iso, renova o seu compromiso colaborando con Amilaxa no desenvolvemento de actividades de diferente índole e contribuíndo desta forma á creación de emprego en Galicia e á integración socio-laboral.
Os primeiros traballos realizados entre ambas entidades foron a elaboración e subministración, por parte do centro de emprego, de 580 cestas de nadal que foron distribuídas entre os traballadores e traballadoras de Viaqua.
