O Ministerio de Defensa apoia o proxecto 'Cidade do TIC' dentro dos terreos da fábrica de armas da Coruña

O Ministerio de Defensa mostrou o seu respaldo ao proxecto de 'Cidade do TIC', que estaría situado nos terreos da fábrica de armas da Coruña, segundo informa o Reitorado coruñés, nun comunicado que subscriben a UDC, o Concello herculino e a Delegación do Goberno en Galicia.

Así se trasladou nunha reunión, en Madrid, co secretario de Estado de Defensa, Ángel Oliveirais. Ao encontro, asistiron o alcalde herculino, Xulio Ferreiro; a subdelegada do Goberno na Coruña, Pilar López-Rioboo; o deputado socialista Ricardo García Mira e o concelleiro de Emprego e Economía Social, Alberto Lema, así como representantes dos traballadores e outras autoridades do Ministerio.

Na reunión, o secretario de Estado de Defensa informou aos asistentes de que xa está asinada a rescisión da actual concesión, "o que permite iniciar outras accións". No encontro, acordouse crear de forma inmediata unha comisión de traballo formada por representantes do Ministerio de Defensa, da Universidade da Coruña e o Concello da Coruña "para ver como se articula o proxecto e buscar a fórmula xurídica para a súa materialización", indica sobre o proxecto dun parque tecnolóxico.

Tanto o reitor como o alcalde e a subdelegada do Goberno manifestaron "a súa plena satisfacción" co resultado do encontro para materializar un proxecto que xurdiu a iniciativa da UDC, coa colaboración do Cluster TIC pola demanda das empresas do sector tecnolóxico de contar cun polo de innovación no que estivese presente a universidade", sinalan desde esta institución.