A illa de Toralla volta ao dominio público
Medio Ambiente abrirá unha senda peonil pública arredor da Illa de Toralla nun proxecto que recuperará e acondicionará 26.500 m2 da illa como espazo público...
Por Galicia Confidencial | Galicia | 17/10/2009 | Actualizada ás 00:44
O Ministerio de Medio Ambiente y Medio Rural y Marino tomou nota e anunciou xa a inminente recuperación da servidume de tránsito ao longo de todo o perímetro da illa, nunha actuación que leva aparellada a recuperación de 26.500 m2 de terreo público e o seu acondicionamento para uso e disfrute de todos e todas. Na actualidade a cidadanía non pode acceder a estes terreos de dominio público por atoparse ilegalmente pechado o paso aos mesmos. Segundo informa o Ministerio estas obras serán contratadas proximamente.
Dous millóns de euros de orzamento
As actuacións consistirán "no trazado dunha senda peonil de 3 m. de ancho a ambos os dous lados da ponte e ao longo de 370 m., por servidume de tránsito, igual que nun pequeno tramo de 90 m. no extremo oeste da illa. O resto do perímetro da illa correspóndese con tres zonas de dominio público marítimo terrestre situadas dous delas ao norte, cunha superficie de 19.000 m2 e 4.000 m2. e a terceira ao sur, de 3.500 m2. O proxecto, que conta cun presuposto de dous millóns de euros, incluirá o acondicionamento destas tres áreas correspondentes a antigas concesións co fin de recuperalas para uso e goce de todos e todas".
A pesar do anuncio e da satisfacción desta medida A Ría Non Se Vende aclara que:
1. Consideramos un erro de redacción afirmar que a senda peonil proxectada discurrirá "pola zona de servidume de tránsito". Loxicamente terá que situarse detrás desa zona, pois o contrario conculcaría o disposto na propia lei de costas.
2. Preguntámonos como ese proxecto non cumpliu o preceptivo trámite de exposición pública.
A RÍA NON SE VENDE considera este éxito nas súas reivindicacións soamente como un primeiro paso. O próximo obxectivo é a eliminación da barreira que impide o paso aos terreos comunais do interior da illa, terreos que gozan dos servizos municipais que pagamos tod@s e deben ser polo tanto tamén para o disfrute de tod@s.
Queremos compartir a ledicia desta nova con tódalas persoas e colectivos que participaron e participan na reivindicación e defensa dos espazos públicos da Ría de Vigo. Nesta ocasión cómpre felicitar especialmente aos nosos compañeiros e compañeiras do Colectivo Xogo Descuberto que levan anos encabezando a loita pola recuperación dos espazos públicos de Toralla.
